aansu

kisī kā ġham sun ke

merī palkoñ pe

ek aañsū jo aa gayā hai

ye aañsū kyā hai

ye aañsū kyā ik gavāh hai

merī dard-mandī kā merī insān-dostī kā

ye aañsū kyā ik subūt hai

merī zindagī meñ ḳhulūs kī ek raushnī kā

ye aañsū kyā ye batā rahā hai

ki mere siine meñ ek hassās dil hai

jis ne kisī kī dil-doz dāstāñ jo sunī

to sun ke taḌap uThā hai

parā.e sho.aloñ meñ jal rahā hai

pighal rahā hai

magar meñ phir ḳhud se pūchhtā huuñ

ye dāstāñ to abhī sunī hai

ye aañsū bhī kyā abhī Dhalā hai

ye aañsū

kyā maiñ ye samjhūñ

pahle kahīñ nahīñ thā

mujhe to shak hai ki ye kahīñ thā

ye mere dil aur merī palkoñ ke darmiyāñ

ik jo fāsla hai

jahāñ ḳhayāloñ ke shahr zinda haiñ

aur ḳhvāboñ kī turbateñ haiñ

jahāñ mohabbat ke ujḌe bāġhoñ meñ

talḳhiyoñ ke babūl haiñ

aur kuchh nahīñ hai

jahāñ se aage haiñ

uljhanoñ ke ghanere jañgal

ye aañsū

shāyad bahut dinoñ se

vahīñ chhupā thā

jinhoñ ne is ko janam diyā thā

vo rañj to maslahat ke hāthoñ

na jaane kab qatl ho ga.e the

to kartā phir kis pe naaz aañsū

ki ho gayā be-javāz aañsū

yatīm aañsū yasīr aañsū

na mo'tabar thā

na rāstoñ se hī bā-ḳhabar thā

to chalte chalte

vo tham gayā thā

ThiThak gayā thā

jhijhak gayā thā

idhar se aaj ik kisī ke ġham kī

kahānī kā kārvāñ jo guzrā

yatīm aañsū ne jaise jaanā

ki is kahānī kī sarparastī mile

to mumkin hai

raah paanā

to ik kahānī kī uñglī thāme

usī ke ġham ko rūmāl kartā

isī ke baare meñ

jhūTe sachche savāl kartā

ye merī palkoñ tak aa gayā hai

kisi ka gham sun ke

meri palkon pe

ek aansu jo aa gaya hai

ye aansu kya hai

ye aansu kya ek gawah hai

meri dard-mandi ka meri insan-dosti ka

ye aansu kya ek subut hai

meri zindagi mein KHulus ki ek raushni ka

ye aansu kya ye bata raha hai

ki mere sine mein ek hassas dil hai

jis ne kisi ki dil-doz dastan jo suni

to sun ke taDap uTha hai

parae shoalon mein jal raha hai

pighal raha hai

magar mein phir KHud se puchhta hun

ye dastan to abhi suni hai

ye aansu bhi kya abhi Dhala hai

ye aansu

kya main ye samjhun

pahle kahin nahin tha

mujhe to shak hai ki ye kahin tha

ye mere dil aur meri palkon ke darmiyan

ek jo fasla hai

jahan KHayalon ke shahr zinda hain

aur KHwabon ki turbaten hain

jahan mohabbat ke ujDe baghon mein

talKHiyon ke babul hain

aur kuchh nahin hai

jahan se aage hain

uljhanon ke ghanere jangal

ye aansu

shayad bahut dinon se

wahin chhupa tha

jinhon ne is ko janam diya tha

wo ranj to maslahat ke hathon

na jaane kab qatl ho gae the

to karta phir kis pe naz aansu

ki ho gaya be-jawaz aansu

yatim aansu yasir aansu

na mo'tabar tha

na raston se hi ba-KHabar tha

to chalte chalte

wo tham gaya tha

ThiThak gaya tha

jhijhak gaya tha

idhar se aaj ek kisi ke gham ki

kahani ka karwan jo guzra

yatim aansu ne jaise jaana

ki is kahani ki sarparasti mile

to mumkin hai

rah pana

to ek kahani ki ungli thame

usi ke gham ko rumal karta

isi ke bare mein

jhuTe sachche sawal karta

ye meri palkon tak aa gaya hai