aansu

vo ek aañsū girā

vo dil ke athāh sāgar meñ ik sadaf kā bhī muñh khulā

vo āsmānoñ kā surma.ī rang

us ke aañsū meñ ghul ke

ruḳhsār ke shafaq par bahā

kahīñ duur jā ke dhartī ke gahre pātāl meñ girā

hazāroñ ākāsh-rang aañsū

havā ke tez aur tund jhoñkoñ meñ muntashir ho ga.e

samundar kī koh jaisī muhīb maujoñ ke andhe ġhāroñ meñ kho ga.e

magar vo aañsū

vo ek motī

jo merī putlī meñ jaḌ gayā hai

hazāroñ rangoñ kā mājrā hai

hazāroñ ashkoñ kā aa.ina hai

wo ek aansu gira

wo dil ke athah sagar mein ek sadaf ka bhi munh khula

wo aasmanon ka surmai rang

us ke aansu mein ghul ke

ruKHsar ke shafaq par baha

kahin dur ja ke dharti ke gahre patal mein gira

hazaron aakash-rang aansu

hawa ke tez aur tund jhonkon mein muntashir ho gae

samundar ki koh jaisi muhib maujon ke andhe ghaaron mein kho gae

magar wo aansu

wo ek moti

jo meri putli mein jaD gaya hai

hazaron rangon ka majra hai

hazaron ashkon ka aaina hai