aap-biti

1

yuuñ to marne ke liye zahr sabhī piite haiñ

zindagī tere liye zahr piyā hai maiñ ne

sham.a jaltī hai par ik raat meñ jal jaatī hai

yaañ to ek umr isī tarah se jalte guzrī

kaun sī ḳhaak hai ye jaane kahāñ kā hai ḳhamīr

ik na.e sāñche meñ har roz hī Dhalte guzrī

kis tarah maiñ ne guzārī haiñ ye ġham kī ghaḌiyāñ

kaash maiñ aisī kahānī ko sunā bhī saktā

ta.ana-zan haiñ jo mire haal pe arbāb-e-nashāt

un ko ik baar maiñ ai kaash rulā bhī saktā

maiñ ki shā.er huuñ maiñ paiġhāmbar-e-fitrat huuñ

merī taḳh.īl meñ hai ek jahān-e-bedār

dastaras meñ mirī nazzāra-e-gul-hā-e-chaman

mere idrāk meñ haiñ kun-fayakūñ ke asrār

mire ash.ār meñ hai qalb-e-hazīñ kī dhaḌkan

merī nazmoñ meñ mirī ruuh kī dil-doz pukār

phir bhī rah rah ke khaTaktī hai mire dil meñ ye baat

ki mire paas to alfāz kā ik parda hai

sirf alfāz se tasvīr nahīñ ban saktī

sirf ehsās meñ hālāt kī tafsīr kahāñ

sirf fariyād meñ zaḳhmoñ kī vo zanjīr kahāñ

aisī zanjīr ki ek ek kaḌī meñ jis kī

kitnī khoī huī ḳhushiyoñ ke manāzir pinhāñ

kitnī bhūlī huī yādoñ ke pur-asrār khañDar

kitne ujḌe hue luuTe hue sunsān nagar

kitne aate hue jaate hue chehroñ ke nuqūsh

kitne bante hue miTte hue lamhāt kā raaz

kitnī uljhī huī rāhoñ ke nasheb aur farāz

2

kyā kahūñ mujh ko kahāñ laa.ī mirī umr-e-ravāñ

aañkh kholī to har ik samt añdheroñ kā samāñ

reñgtī ūñghtī maġhmūm sī ik rāhguzār

gard-e-ālām meñ khoyā huā manzil kā nishāñ

gesū-e-shām se lipTī huī ġham kī zanjīr

sīna-e-shab se nikaltī huī fariyād-o-fuġhāñ

ThanDī ThanDī sī havāoñ meñ vo ġhurbat kī thakan

dar-o-dīvār pe tārīk se saa.e larzāñ

kitnī khoī huī bīmār o fasurda āñkheñ

TimTimāte se diye chaar taraf nauha-kunāñ

muzmahil chehre masā.ib kī girāñ-bārī se

dil-e-majrūh se uThtā huā ġhamnāk dhuāñ

yahī tārīkī-e-ġham to mirā gahvāra hai

maiñ isī kokh meñ thā nūr-e-sahar ke mānind

har taraf sog meñ Duubā huā merā māhaul

merā ujḌā huā ghar 'mīr' ke ghar ke mānind

ik taraf azmat-e-aslāf kā māthe pe ġhurūr

aur ik samt vo iflās ke phaile hue jaal

bhuuk kī aag meñ jhulse hue saare armāñ

qarz ke bojh se jiine kī umañgeñ pāmāl

vaqt kī dhund meñ lipTe hue kuchh pyaar ke giit

mehr o iḳhlās zamāne kī jafāoñ se niDhāl

bhaa.ī bhaa.ī kī mohabbat meñ nirāle se shukūk

nigah-e-ġhair meñ jis tarah anokhe se savāl

''ek hañgāme pe mauqūf thī ghar kī raunaq''

muflisī saath liye aa.ī thī ik jañg-o-jidāl

fāqa-mastī meñ bikharte hue saare rishte

tañg-dastī ke sabab saarī fazā.eñ behāl

ik jahannam kī tarah thā ye mirā gahvāra

is jahannam meñ mere baap ne dam toḌ diyā

TuuT kar rah ga.e bachpan ke suhāne sapne

mujh se muñh pher liyā jaise mirī shoḳhī ne

mere hañste hue chehre pe udāsī chhā.ī

jaise ik raat bhayānak mire sar par aa.ī

rāheñ dushvār magar rāh-numā koī na thā

sāmne vus.at-e-aflāk ḳhudā koī na thā

mere ajdād kī mīrās ye vīrān sā ghar

jis ko ghere hue har samt tabāhī ke bhañvar

jis kī chhat girtī huī TuuTā huā darvāza

har taraf jaise bikhartā huā ik shīrāza

na kahīñ atlas-o-kamḳhvāb na dībā-o-harīr

har taraf muñh ko basore hue jaise taqdīr

mujh ko us ghar se mohabbat to bhalā kyā hotī

yaañ agar dil meñ na jiine kī tamannā hotī

ye samajh kar ki yahī hai mirī qismat kā likhā

us kī dīvār ke saa.e meñ lipTā rahtā

lekin is dil kī ḳhalish ne mujhe bedār kiyā

mujh ko hālāt se āmāda-e-paikār kiyā

be-kasī raḳht-e-safar ban kar mire saath chalī

yaad aa.ī thī mujhe gaañv kī ek ek galī

lahlahātī huī fasleñ vo mire aam ke baaġh

vo makānoñ meñ larazte hue dhuñdle se charāġh

duur tak paanī meñ phaile hue vo dhaan ke khet

aur tālāb-kināre vo chamaktī huī ret

mere ham-umr vo sāthī vo mire ham-jolī

mere schōl ke vo dost mirī vo Tolī

ek baar un kī nigāhoñ ne mujhe dekhā thā

jaise ik baar mire dil ne bhī kuchh sochā thā

''maiñ ne jab vādi-e-ġhurbat meñ qadam rakkhā thā

duur tak yād-e-vatan aa.ī thī samjhāne ko''

1

yun to marne ke liye zahr sabhi pite hain

zindagi tere liye zahr piya hai main ne

shama jalti hai par ek raat mein jal jati hai

yan to ek umr isi tarah se jalte guzri

kaun si KHak hai ye jaane kahan ka hai KHamir

ek nae sanche mein har roz hi Dhalte guzri

kis tarah main ne guzari hain ye gham ki ghaDiyan

kash main aisi kahani ko suna bhi sakta

tana-zan hain jo mere haal pe arbab-e-nashat

un ko ek bar main ai kash rula bhi sakta

main ki shaer hun main paighambar-e-fitrat hun

meri taKHil mein hai ek jahan-e-bedar

dastaras mein meri nazzara-e-gul-ha-e-chaman

mere idrak mein hain kun-fayakun ke asrar

mere ashaar mein hai qalb-e-hazin ki dhaDkan

meri nazmon mein meri ruh ki dil-doz pukar

phir bhi rah rah ke khaTakti hai mere dil mein ye baat

ki mere pas to alfaz ka ek parda hai

sirf alfaz se taswir nahin ban sakti

sirf ehsas mein haalat ki tafsir kahan

sirf fariyaad mein zaKHmon ki wo zanjir kahan

aisi zanjir ki ek ek kaDi mein jis ki

kitni khoi hui KHushiyon ke manazir pinhan

kitni bhuli hui yaadon ke pur-asrar khanDar

kitne ujDe hue luTe hue sunsan nagar

kitne aate hue jate hue chehron ke nuqush

kitne bante hue miTte hue lamhat ka raaz

kitni uljhi hui rahon ke nasheb aur faraaz

2

kya kahun mujh ko kahan lai meri umr-e-rawan

aankh kholi to har ek samt andheron ka saman

rengti unghti maghmum si ek rahguzar

gard-e-alam mein khoya hua manzil ka nishan

gesu-e-sham se lipTi hui gham ki zanjir

sina-e-shab se nikalti hui fariyaad-o-fughan

ThanDi ThanDi si hawaon mein wo ghurbat ki thakan

dar-o-diwar pe tarik se sae larzan

kitni khoi hui bimar o fasurda aankhen

TimTimate se diye chaar taraf nauha-kunan

muzmahil chehre masaib ki giran-bari se

dil-e-majruh se uThta hua ghamnak dhuan

yahi tariki-e-gham to mera gahwara hai

main isi kokh mein tha nur-e-sahar ke manind

har taraf sog mein Duba hua mera mahaul

mera ujDa hua ghar 'mir' ke ghar ke manind

ek taraf azmat-e-aslaf ka mathe pe ghurur

aur ek samt wo iflas ke phaile hue jal

bhuk ki aag mein jhulse hue sare arman

qarz ke bojh se jine ki umangen pamal

waqt ki dhund mein lipTe hue kuchh pyar ke git

mehr o iKHlas zamane ki jafaon se niDhaal

bhai bhai ki mohabbat mein nirale se shukuk

nigah-e-ghair mein jis tarah anokhe se sawal

ek hangame pe mauquf thi ghar ki raunaq

muflisi sath liye aai thi ek jang-o-jidal

faqa-masti mein bikharte hue sare rishte

tang-dasti ke sabab sari fazaen behaal

ek jahannam ki tarah tha ye mera gahwara

is jahannam mein mere bap ne dam toD diya

TuT kar rah gae bachpan ke suhane sapne

mujh se munh pher liya jaise meri shoKHi ne

mere hanste hue chehre pe udasi chhai

jaise ek raat bhayanak mere sar par aai

rahen dushwar magar rah-numa koi na tha

samne wusat-e-aflak KHuda koi na tha

mere ajdad ki miras ye viran sa ghar

jis ko ghere hue har samt tabahi ke bhanwar

jis ki chhat girti hui TuTa hua darwaza

har taraf jaise bikharta hua ek shiraaza

na kahin atlas-o-kamKHwab na diba-o-harir

har taraf munh ko basore hue jaise taqdir

mujh ko us ghar se mohabbat to bhala kya hoti

yan agar dil mein na jine ki tamanna hoti

ye samajh kar ki yahi hai meri qismat ka likha

us ki diwar ke sae mein lipTa rahta

lekin is dil ki KHalish ne mujhe bedar kiya

mujh ko haalat se aamada-e-paikar kiya

be-kasi raKHt-e-safar ban kar mere sath chali

yaad aai thi mujhe ganw ki ek ek gali

lahlahati hui faslen wo mere aam ke bagh

wo makanon mein larazte hue dhundle se charagh

dur tak pani mein phaile hue wo dhan ke khet

aur talab-kinare wo chamakti hui ret

mere ham-umr wo sathi wo mere ham-joli

mere school ke wo dost meri wo Toli

ek bar un ki nigahon ne mujhe dekha tha

jaise ek bar mere dil ne bhi kuchh socha tha

main ne jab wadi-e-ghurbat mein qadam rakkha tha

dur tak yaad-e-watan aai thi samjhane ko