aaraf

savāliya nishān kī qatār meñ khaḌe hue mufakkiro!

javāb do

vo kaun, kaisā, kis liye, kahāñ pe, kab se, kab talak?

savāl-e-shash-jahāt kā javāb koī ab talak?

''magar yahāñ kushād-e-chashm-o-lab kisī ke bas meñ hai

savāl tak rasā.ī jab muhāl hai

to himmat-e-javāb kis ke bas meñ hai

vo kis kī dastaras meñ hai

jo ma.arifat ke lab khule

to pattharoñ kī bārishoñ se sūliyāñ lahūluhān ho ga.iiñ

agar kisī payambar-e-azīm kī nazar uThī

nigāh bāzgasht-e-nā-murād kī shikastagī ke vaar se

basīratoñ ke zo.am meñ basārteñ bhī jal ga.iiñ

to Thiik hai

tumheñ kushād-e-chashm-o-lab kī lazzatoñ kī kyā ḳhabar

so tum hanūz barzaḳh-e-tazabzub-o-gumān meñ paḌe raho

mufakkiro!

savāliya nishān kī qatār meñ khaḌe raho

sawaliya nishan ki qatar mein khaDe hue mufakkiro!

jawab do

wo kaun, kaisa, kis liye, kahan pe, kab se, kab talak?

sawal-e-shash-jahat ka jawab koi ab talak?

magar yahan kushad-e-chashm-o-lab kisi ke bas mein hai

sawal tak rasai jab muhaal hai

to himmat-e-jawab kis ke bas mein hai

wo kis ki dastaras mein hai

jo marifat ke lab khule

to pattharon ki barishon se suliyan lahuluhan ho gain

agar kisi payambar-e-azim ki nazar uThi

nigah bazgasht-e-na-murad ki shikastagi ke war se

basiraton ke zoam mein basarten bhi jal gain

to Thik hai

tumhein kushad-e-chashm-o-lab ki lazzaton ki kya KHabar

so tum hanuz barzaKH-e-tazabzub-o-guman mein paDe raho

mufakkiro!

sawaliya nishan ki qatar mein khaDe raho