aariyon ki pahli aamad hindostan mein

vo dekh ki maujeñ raqs-kunāñ haiñ sat.h-e-zamīñ par gañgā kī

nau-vārid āriya hairat meñ haiñ dekh ke shaan is dariyā kī

gañgotarī se aatī hai chalī, aThkheliyāñ kartī dhaar is kī

āzādī hai tevar se ayaañ matvālī hai raftār is kī

uttar kī taraf jab uThtī hai is qāfila-e-maġhrib kī nazar

paḌtī huī kirneñ suraj kī haiñ dekhte barf ke tūdoñ par

har qulla-e-koh-e-himāliya par azmat ke haiñ bādal chhā.e hue

sīnoñ ko haiñ taane dev khaḌe ambar se siroñ ko milā.e

bargad ke daraḳhtoñ se jañgal phaile haiñ pahāḌ ke dāman meñ

shāḳheñ haiñ jo un kī sāya-fagan zulmat kā samāñ hai har ban meñ

phirte haiñ vo fīl-e-mast yahāñ hai dev kā jin ke qad pe gumāñ

ye kaalī ghaTā jab dauḌtī hai aatā hai nazar haibat kā samāñ

haiñ rañg-ba-rañg ke phuul khile zīnat hai chaman ke shabāb un kā

kholā hai nasīm-e-sahar ne abhī kis shaan se band naqāb un kā

aate haiñ musāfir hind meñ jo ḳhaibar ke daroñ se utar ke abhī

dekhe the unhoñ ne lāla-o-gul pāmīr kī vaadī meñ na kabhī

taa.ir bhī yahāñ paidā haiñ kiye qudrat ne ajab gul-rañg-o-hāsīñ

gar zamzame un kī raushnī sun leñ yaad aa.e unhīñ firdaus-e-barīñ

indr ke akhāḌe kī pariyāñ gaatī haiñ jo dil-kash rāgniyāñ

ye loch suroñ meñ un ke nahīñ ye soz guloñ meñ un ke kahāñ

sūraj kī chamaktī huī kirneñ haiñ chheḌtī ThanDī havāoñ ko

bhar detī haiñ nūr-o-harārat se bāġhoñ ko aur un kī fazāoñ ko

sotī hui sauteñ chashmoñ kī uThtī haiñ sab āñkheñ mal mal kar

dhāreñ haiñ jo barf ke paanī kī aatī haiñ pahāḌoñ se chal kar

ai āriyoñ qadam rakho in hasan bhare gulzāroñ meñ

jannat ke maze lūToge sadā is paak zamīñ kī bahāroñ meñ

tum gañg-o-jaman ke kināroñ par shahr apne na.e ābād karo

gā gā ke bhajan kar kar ke havan ho jaao magan dil-shād karo

wo dekh ki maujen raqs-kunan hain sath-e-zamin par ganga ki

nau-warid aariya hairat mein hain dekh ke shan is dariya ki

gangotari se aati hai chali, aThkheliyan karti dhaar is ki

aazadi hai tewar se ayan matwali hai raftar is ki

uttar ki taraf jab uThti hai is qafila-e-maghrib ki nazar

paDti hui kirnen suraj ki hain dekhte barf ke tudon par

har qulla-e-koh-e-himaliya par azmat ke hain baadal chhae hue

sinon ko hain tane dew khaDe ambar se siron ko milae

bargad ke daraKHton se jangal phaile hain pahaD ke daman mein

shaKHen hain jo un ki saya-fagan zulmat ka saman hai har ban mein

phirte hain wo fil-e-mast yahan hai dew ka jin ke qad pe guman

ye kali ghaTa jab dauDti hai aata hai nazar haibat ka saman

hain rang-ba-rang ke phul khile zinat hai chaman ke shabab un ka

khola hai nasim-e-sahar ne abhi kis shan se band naqab un ka

aate hain musafir hind mein jo KHaibar ke daron se utar ke abhi

dekhe the unhon ne lala-o-gul pamir ki wadi mein na kabhi

tair bhi yahan paida hain kiye qudrat ne ajab gul-rang-o-hasin

gar zamzame un ki raushni sun len yaad aae unhin firdaus-e-barin

indr ke akhaDe ki pariyan gati hain jo dil-kash ragniyan

ye loch suron mein un ke nahin ye soz gulon mein un ke kahan

suraj ki chamakti hui kirnen hain chheDti ThanDi hawaon ko

bhar deti hain nur-o-hararat se baghon ko aur un ki fazaon ko

soti hui sauten chashmon ki uThti hain sab aankhen mal mal kar

dhaaren hain jo barf ke pani ki aati hain pahaDon se chal kar

ai aariyon qadam rakho in hasan bhare gulzaron mein

jannat ke maze luToge sada is pak zamin ki bahaaron mein

tum gang-o-jaman ke kinaron par shahr apne nae aabaad karo

ga ga ke bhajan kar kar ke hawan ho jao magan dil-shad karo