aasar-e-qadima

ek patthar kī adhūrī mūrat

chand tāñbe ke purāne sikke

kaalī chāñdī ke ajab se zevar

aur ka.ī kāñse ke TuuTe bartan

ek sahrā mile

zer-e-zamīñ

log kahte haiñ ki sadiyoñ pahle

aaj sahrā hai jahāñ

vahīñ ik shahr huā kartā thā

aur mujh ko ye ḳhayāl aatā hai

kisī taqrīb

kisī mahfil meñ

sāmnā tujh se mirā aaj bhī ho jaatā hai

ek lamhe ko

bas ik pal ke liye

jism kī aañch

uchaTtī sī nazar

surḳh bindiyā kī damak

sarsarāhaT tirī malbūs kī

bāloñ kī mahak

be-ḳhayālī meñ kabhī

lams kā nanhā sā phuul

aur phir duur tak vahī sahrā

vahī sahrā ki jahāñ

kabhī ik shahr huā kartā thā

ek patthar ki adhuri murat

chand tanbe ke purane sikke

kali chandi ke ajab se zewar

aur kai kanse ke TuTe bartan

ek sahra mile

zer-e-zamin

log kahte hain ki sadiyon pahle

aaj sahra hai jahan

wahin ek shahr hua karta tha

aur mujh ko ye KHayal aata hai

kisi taqrib

kisi mahfil mein

samna tujh se mera aaj bhi ho jata hai

ek lamhe ko

bas ek pal ke liye

jism ki aanch

uchaTti si nazar

surKH bindiya ki damak

sarsarahaT teri malbus ki

baalon ki mahak

be-KHayali mein kabhi

lams ka nanha sa phul

aur phir dur tak wahi sahra

wahi sahra ki jahan

kabhi ek shahr hua karta tha