aasar-e-qadima se nikla ek nawishta

hamārī aañkh meñ nokīle kāñTe

aur badan meñ

zahr ke neze tarāzū ho chuke the

jab siyah shab ne

gulābī sub.h ke ġharqāb hone kī ḳhabar par

ham se faurī tabsira māñgā

hamāre hoñT

itne ḳhushk,

aur itne darīda the

ki ham ik lafz bhī kahte

to reza reza ho jaate

qalam hāthoñ meñ kyā lete

ki apne haath pahle hī qalam the

(kyā suḳhan kahte

kahāñ likhte, kise likhte)

so ahl-e-jāh ne

jo tabsira (jo qatl-nāma) sāmne rakkhā

ham ahl-e-sabr ne

ḳhūñ-rañg hoñToñ kī darīda mehr

us par sabt kar dī

hamari aankh mein nokile kanTe

aur badan mein

zahr ke neze taraazu ho chuke the

jab siyah shab ne

gulabi subh ke gharqab hone ki KHabar par

hum se fauri tabsira manga

hamare honT

itne KHushk,

aur itne darida the

ki hum ek lafz bhi kahte

to reza reza ho jate

qalam hathon mein kya lete

ki apne hath pahle hi qalam the

(kya suKHan kahte

kahan likhte, kise likhte)

so ahl-e-jah ne

jo tabsira (jo qatl-nama) samne rakkha

hum ahl-e-sabr ne

KHun-rang honTon ki darida mehr

us par sabt kar di