aawara

ḳhuub hañs lo mirī āvāra-mizājī par tum

maiñ ne barsoñ yuuñ hī khaa.e haiñ mohabbat ke fareb

ab na ehsās-e-taqaddus na rivāyat kī fikr

ab ujāloñ meñ na khā.ūñgī maiñ zulmat ke fareb

ḳhuub hañs lo ki mire haal pe sab hañste haiñ

merī āñkhoñ se kisī ne bhī na aañsū poñchhe

mujh ko hamdard nigāhoñ kī zarūrat bhī nahīñ

aur sho.aloñ ko baḌhāte haiñ havā ke jhoñke

ḳhuub hañs lo ki takalluf se bahut duur huuñ maiñ

maiñ ne masnūī tabassum kā bhī dekhā anjām

mujh se kyuuñ duur raho aao maiñ āvāra huuñ

apne hāthoñ se pilāo to mai-e-talḳh kā jaam

ḳhuub hañs lo ki yahī vaqt guzar jā.egā

kal na vāraftagi-e-shauq se dekhegā koī

itnī ma.asūm latāfat se na khelegā koī

ḳhuub hañs lo ki yahī lamhe ġhanīmat haiñ abhī

merī hī tarah se tum bhī to ho āvāra-mizāj

kitnī bāñhoñ ne tumheñ shauq se jakḌā hogā

kitne jalte hue hoñToñ ne liyā hogā ḳhirāj

ḳhuub hañs lo tumheñ biite hue lamhoñ kī qasam

merī bahkī huī bātoñ kā burā mat maano

mere ehsās ko tahzīb kuchal detī hai

tum bhī tahzīb ke malbūs utāro pheñko

ḳhuub hañs lo ki mire lamhe gurezāñ haiñ ab

merī rag rag meñ abhī mastī-e-sahbā bhar do

maiñ bhī tahzīb se bezār huuñ tum bhī bezār

aur is jism-e-barahna ko barahna kar do

KHub hans lo meri aawara-mizaji par tum

main ne barson yun hi khae hain mohabbat ke fareb

ab na ehsas-e-taqaddus na riwayat ki fikr

ab ujalon mein na khaungi main zulmat ke fareb

KHub hans lo ki mere haal pe sab hanste hain

meri aankhon se kisi ne bhi na aansu ponchhe

mujh ko hamdard nigahon ki zarurat bhi nahin

aur shoalon ko baDhate hain hawa ke jhonke

KHub hans lo ki takalluf se bahut dur hun main

main ne masnui tabassum ka bhi dekha anjam

mujh se kyun dur raho aao main aawara hun

apne hathon se pilao to mai-e-talKH ka jam

KHub hans lo ki yahi waqt guzar jaega

kal na waraftagi-e-shauq se dekhega koi

itni masum latafat se na khelega koi

KHub hans lo ki yahi lamhe ghanimat hain abhi

meri hi tarah se tum bhi to ho aawara-mizaj

kitni banhon ne tumhein shauq se jakDa hoga

kitne jalte hue honTon ne liya hoga KHiraj

KHub hans lo tumhein bite hue lamhon ki qasam

meri bahki hui baaton ka bura mat mano

mere ehsas ko tahzib kuchal deti hai

tum bhi tahzib ke malbus utaro phenko

KHub hans lo ki mere lamhe gurezan hain ab

meri rag rag mein abhi masti-e-sahba bhar do

main bhi tahzib se bezar hun tum bhi bezar

aur is jism-e-barahna ko barahna kar do