aawara-gard lamhe

āvāra-gard lamhe yuuñ be-qarār bhaTkeñ

jaise parind pyāse dīvāna-vār bhaTkeñ

be-jān-o-be-takallum ik aarzū hai tanhā

jañgal meñ jaise koī vīrān sī imārat

bastī se duur jaise ḳhāmoshiyoñ kā parbat

taane khaḌā ho ḳhud ko jāmid sadī kī sūrat

ehsās apnī lau par yuuñ tamtamā.e jaise

sho.aloñ pe chal rahā ho ik be-libās jogī

kahtī hai aql ham ko jalvat-pasand rogī

kyā sādhūoñ meñ aisī jvālā jagī na hogī

aksar sameTte haiñ bikhre hue junūñ ko

ham log aaj bhī haiñ kis darja nā-mukammal

shaitāñ sifat sharāre oḌhe dhueñ ke kambal

doshīzgī ġham ko jhulsā.eñ jab musalsal

chiñghāḌtī haiñ sāñseñ sīnoñ meñ be-tahāshā

jaise aziim insāñ pāmāl ho gayā ho

jaise har ek luT kar kañgāl ho gayā ho

ik muḳhtasar sā pal bhī sad saal ho gayā ho

ajgar guphā meñ leTā shīrīniyāñ chabā.e

aur ham ye sūkhe patte ab tak baTorte haiñ

aawara-gard lamhe yun be-qarar bhaTken

jaise parind pyase diwana-war bhaTken

be-jaan-o-be-takallum ek aarzu hai tanha

jangal mein jaise koi viran si imarat

basti se dur jaise KHamoshiyon ka parbat

tane khaDa ho KHud ko jamid sadi ki surat

ehsas apni lau par yun tamtamae jaise

shoalon pe chal raha ho ek be-libas jogi

kahti hai aql hum ko jalwat-pasand rogi

kya sadhuon mein aisi jwala jagi na hogi

aksar sameTte hain bikhre hue junun ko

hum log aaj bhi hain kis darja na-mukammal

shaitan sifat sharare oDhe dhuen ke kambal

doshizgi gham ko jhulsaen jab musalsal

chinghaDti hain sansen sinon mein be-tahasha

jaise azim insan pamal ho gaya ho

jaise har ek luT kar kangal ho gaya ho

ek muKHtasar sa pal bhi sad sal ho gaya ho

ajgar gupha mein leTa shiriniyan chabae

aur hum ye sukhe patte ab tak baTorte hain