aawara

koī yaad aisī nahīñ

jo mujhe raah chalte hue rok le merā dāman pakḌe

mire paañv meñ ek zanjīr sī Daal de

koī bhī aisā biitā huā pal nahīñ

mast jhoñke ke mānind jo gungunātā huā duur se aa.e

vīrān āñkhoñ se lipTe

kisī bhūlī-bisrī huī baat kā giit gaa.e

mire sāmne ek phailā huā jaal hai rāstoñ kā

qatāreñ haiñ bijlī ke khamboñ kī ūñche makānoñ kī paTriyoñ kī

magar koī bhī rāsta koī bhī raushnī

koī khiḌkī kisī peḌ kā saaya aisā nahīñ hai

jise dekh kar

mehrbān aañkh kī muskurāhaT mujhe yaad aa.e

bhaTaktī huī ruuh ko apnī bāñhoñ meñ le le

koi yaad aisi nahin

jo mujhe rah chalte hue rok le mera daman pakDe

mere panw mein ek zanjir si Dal de

koi bhi aisa bita hua pal nahin

mast jhonke ke manind jo gungunata hua dur se aae

viran aankhon se lipTe

kisi bhuli-bisri hui baat ka git gae

mere samne ek phaila hua jal hai raston ka

qataren hain bijli ke khambon ki unche makanon ki paTriyon ki

magar koi bhi rasta koi bhi raushni

koi khiDki kisi peD ka saya aisa nahin hai

jise dekh kar

mehrban aankh ki muskurahaT mujhe yaad aae

bhaTakti hui ruh ko apni banhon mein le le