aawara sajde

ik yahī soz-e-nihāñ kul mirā sarmāya hai

dosto maiñ kise ye soz-e-nihāñ nazr karūñ

koī qātil sar-e-maqtal nazar aatā hī nahīñ

kis ko dil nazr karūñ aur kise jaañ nazr karūñ

tum bhī mahbūb mire, tum bhī ho dildār mire

āshnā mujh se magar tum bhī nahīñ, tum bhī nahīñ

ḳhatm hai tum pe masīhā-nafasī, chāragarī

mahram-e-dard-e-jigar tum bhī nahīñ tum bhī nahīñ

apnī laash aap uThānā koī āsān nahīñ

dast-o-bāzū mire nākāra hue jaate haiñ

jin se har daur meñ chamkī hai tumhārī dahlīz

aaj sajde vahī āvāra hue jaate haiñ

dard-e-manzil thii, magar aisī bhī kuchh duur na thī

le ke phirtī rahī raste hī meñ vahshat mujh ko

ek zaḳhm aisā na khāyā ki bahār aa jaatī

daar tak le ke gayā shauq-e-shahādat mujh ko

raah meñ TuuT ga.e paañv to ma.alūm huā

juz mire aur mirā rāh-numā koī nahīñ

ek ke ba.ad ḳhudā ek chalā aatā thā

kah diyā aql ne tañg aa ke ḳhudā koī nahīñ

ek yahi soz-e-nihan kul mera sarmaya hai

dosto main kise ye soz-e-nihan nazr karun

koi qatil sar-e-maqtal nazar aata hi nahin

kis ko dil nazr karun aur kise jaan nazr karun

tum bhi mahbub mire, tum bhi ho dildar mere

aashna mujh se magar tum bhi nahin, tum bhi nahin

KHatm hai tum pe masiha-nafasi, chaaragari

mahram-e-dard-e-jigar tum bhi nahin tum bhi nahin

apni lash aap uThana koi aasan nahin

dast-o-bazu mere nakara hue jate hain

jin se har daur mein chamki hai tumhaari dahliz

aaj sajde wahi aawara hue jate hain

dard-e-manzil thi, magar aisi bhi kuchh dur na thi

le ke phirti rahi raste hi mein wahshat mujh ko

ek zaKHm aisa na khaya ki bahaar aa jati

dar tak le ke gaya shauq-e-shahadat mujh ko

rah mein TuT gae panw to malum hua

juz mere aur mera rah-numa koi nahin

ek ke baad KHuda ek chala aata tha

kah diya aql ne tang aa ke KHuda koi nahin