aazadgi

vaqt kā bojh

pathrīlī chup

ūñche ūñche pahāḌ

maiñ pahāḌoñ ke dāman meñ phailī huī ghaas par

pattī pattī kī tahrīr paḌhtā huuñ asrār meñ ġharq huuñ

der se jhiil kī aañkh jhapkī

na sahme hue par kahīñ phaḌphaḌā.e

na kaliyāñ hī chaTkīñ

na patte hile

har ghanā peḌ nirvān kī aas meñ gum hai

sūkhī huī Tahniyāñ sab salībeñ haiñ

har ġhaar jaise kisī jibraīl-e-amīñ ke liye hai

kailāsh chup-chāp hai

guuñj hī guuñj

be-lafz-o-ma.anī faqat ek guuñj

''sārī sachchā.iyāñ

jhuuT kī kokh se phuuT kar

lahlahātī haiñ, ḳhushbū luTātī haiñ, phir jhuuT hī kī taraf

lauT jaatī haiñ tum se mujhe

bhalā kyā gilā''

guuñj hī guuñj

be-lafz o ma.anī faqat ek guuñj

bansurī kī madhur taan gūñjī to aise lagā

jaise mujh meñ kisī ne

parinde kī mānind par jhaaḌ kar jhurjhurī lī

jhāḌiyoñ meñ

pur-asrār sī sarsarāhaT

koī paiġhām, qadmoñ kī aahaT

nahīñ kuchh nahīñ

ek charvāhā bheḌoñ kā galla liye aa gayā

sabza-zāroñ pe ma.asūm bheḌeñ baḌhīñ

dekhte dekhte

pattī pattī kī tahrīr

asrār sab char ga.iiñ

waqt ka bojh

pathrili chup

unche unche pahaD

main pahaDon ke daman mein phaili hui ghas par

patti patti ki tahrir paDhta hun asrar mein gharq hun

der se jhil ki aankh jhapki

na sahme hue par kahin phaDphaDae

na kaliyan hi chaTkin

na patte hile

har ghana peD nirwan ki aas mein gum hai

sukhi hui Tahniyan sab saliben hain

har ghaar jaise kisi jibrail-e-amin ke liye hai

kailash chup-chap hai

gunj hi gunj

be-lafz-o-mani faqat ek gunj

sari sachchaiyan

jhuT ki kokh se phuT kar

lahlahati hain, KHushbu luTati hain, phir jhuT hi ki taraf

lauT jati hain tum se mujhe

bhala kya gila

gunj hi gunj

be-lafz o mani faqat ek gunj

bansuri ki madhur tan gunji to aise laga

jaise mujh mein kisi ne

parinde ki manind par jhaD kar jhurjhuri li

jhaDiyon mein

pur-asrar si sarsarahaT

koi paigham, qadmon ki aahaT

nahin kuchh nahin

ek charwaha bheDon ka galla liye aa gaya

sabza-zaron pe masum bheDen baDhin

dekhte dekhte

patti patti ki tahrir

asrar sab char gain