aazadi

jī meñ aatā hai ham bhī uḌāneñ bhareñ

āsānoñ kī niilī hadoñ ko chhueñ

sāgaroñ aur nadiyoñ meñ ġhaltāñ raheñ

shahr meñ gaañv meñ jangaloñ meñ phireñ

jī meñ aatā hai phūloñ kī ra.pngat

khetoñ kā hasīñ bāñkpan

bāñsurī kī vo tāneñ

papīhoñ ke bol

raqs kartī huī in fazāoñ kī mad.hoshiyāñ

kār-ḳhānoñ kī hangāma-ārā.iyāñ

bhūke pyāse mahloñ kī vīrāniyāñ

dard kī hasratoñ kī ye tārīkiyāñ

saarī mahrūmiyāñ saarī majbūriyāñ

apnī hastī meñ bhar leñ

sub.h-dam narm-o-tāza bahāroñ ke masrūr jhoñke

ham ko tārīk aur ġham-zada raat kī

uljhanoñ vahshatoñ se dilā deñ najāt

jin meñ sadiyoñ se hai qaid apnī hayāt

na.ī-o-tāza havāoñ ke masrūr jhoñkoñ meñ shaktī kahāñ

ki tauq-o-dār-o-rasan se vo āzād kar deñ

apnī āzādī ham ko hī paanī paḌegī

jaan kī dil kī baazī lagānī paḌegī

zimmedārī aham hai uThānī paḌegī

aaj dīvār-e-zindāñ Dhānī paḌegī

apnī sāñsoñ kī garmī se

ḳhvāboñ kī lau se

apne ashkoñ ke zahrāb se

apne armānoñ kī lamha lamha dahaktī huī aag se

tauq ko aur zanjīr ko

qaid ko aur jallād ko

zālimoñ kī kamīñ-gāh ko

in añdheroñ ke dahshat-zada ūñche ūñche mināroñ ko

pighlā deñ Dhā deñ chalo ḳhaak kar deñ

har taraf ek surḳhī sī chhā jā.egī

zindagī apnī manzil ko pā jā.egī

ji mein aata hai hum bhi uDanen bharen

aasanon ki nili hadon ko chhuen

sagaron aur nadiyon mein ghaltan rahen

shahr mein ganw mein jangalon mein phiren

ji mein aata hai phulon ki rapngat

kheton ka hasin bankpan

bansuri ki wo tanen

papihon ke bol

raqs karti hui in fazaon ki madhoshiyan

kar-KHanon ki hangama-araiyan

bhuke pyase mahlon ki viraniyan

dard ki hasraton ki ye tarikiyan

sari mahrumiyan sari majburiyan

apni hasti mein bhar len

subh-dam narm-o-taza bahaaron ke masrur jhonke

hum ko tarik aur gham-zada raat ki

uljhanon wahshaton se dila den najat

jin mein sadiyon se hai qaid apni hayat

nai-o-taza hawaon ke masrur jhonkon mein shakti kahan

ki tauq-o-dar-o-rasan se wo aazad kar den

apni aazadi hum ko hi pani paDegi

jaan ki dil ki bazi lagani paDegi

zimmedari aham hai uThani paDegi

aaj diwar-e-zindan Dhani paDegi

apni sanson ki garmi se

KHwabon ki lau se

apne ashkon ke zahrab se

apne armanon ki lamha lamha dahakti hui aag se

tauq ko aur zanjir ko

qaid ko aur jallad ko

zalimon ki kamin-gah ko

in andheron ke dahshat-zada unche unche minaron ko

pighla den Dha den chalo KHak kar den

har taraf ek surKHi si chha jaegi

zindagi apni manzil ko pa jaegi