aazadi ka git

aaj ham sab shaad haiñ apnā vatan āzād hai

ham haiñ bulbul jis chaman ke vo chaman āzād hai

aaj āzādī kā din hai aao ham ḳhushiyāñ manā.eñ

naach āzādī kā nācheñ giit āzādī ke gaa.eñ

thī ghaTā chhā.ī huī andher kī vo chhaT ga.ī

teġh-e-āzādī se zanjīr-e-ġhulāmī kaT ga.ī

aaj vo din hai huī thī desh kī jantā kī jiit

aaj hī ke din chalī thī is meñ āzādī kī riit

aaj vo din hai tarāne aish ke ishrat ke gaa.eñ

aaj vo din hai ki tāneñ mil ke ḳhushiyoñ kī uḌā.eñ

qaum jo āzād hai duniyā meñ izzat us kī hai

aan us kī shaan us kī aur azmat us kī hai

desh ke bachche bhī ḳhush haiñ kyoñ na ho in kī ḳhushī

khil ga.ī hai phuul ban kar aaj har dil kī kalī

dil lagī hai chahl hai aur har taraf haiñ qahqahe

haiñ ye bulbul is chaman ke kar rahe haiñ chahchahe

dil meñ jazba hai javāñ ho kar sabhī aage baḌheñ

azm hai ye jān-o-dil se des kī ḳhidmat kareñ

amn-o-āzādī kā ham paiġhām duniyā ko sunā.eñ

des kī apne baḌā.ī apne kāmoñ se dikhā.eñ

farz apnā ham kareñ dil se adā aur jaan se

ho vafādārī hamārī apne hindostān se

ek ik bachcha ga.ī ho ilm kā charchā baḌhe

ek ik bachcha dhanī ho des kī sevā kare

ek ik bachcha rahe baḌh chaḌh ke gun aur gyaan meñ

ik se ik baḌh kar dikhā.e aap ko vigyān meñ

aao 'nayyar' des ke bachchoñ kī jhurmuT meñ tum aao

aao aao nazm āzādī kī bachchoñ ko sunāo

aao sab na.ara lagā.eñ zindabād hindostān

aao ham sab mil ke gaa.eñ zindabād hindostān

zindabād hindostān

zindabād

aaj hum sab shad hain apna watan aazad hai

hum hain bulbul jis chaman ke wo chaman aazad hai

aaj aazadi ka din hai aao hum KHushiyan manaen

nach aazadi ka nachen git aazadi ke gaen

thi ghaTa chhai hui andher ki wo chhaT gai

tegh-e-azadi se zanjir-e-ghulami kaT gai

aaj wo din hai hui thi desh ki janta ki jit

aaj hi ke din chali thi is mein aazadi ki rit

aaj wo din hai tarane aish ke ishrat ke gaen

aaj wo din hai ki tanen mil ke KHushiyon ki uDaen

qaum jo aazad hai duniya mein izzat us ki hai

aan us ki shan us ki aur azmat us ki hai

desh ke bachche bhi KHush hain kyon na ho in ki KHushi

khil gai hai phul ban kar aaj har dil ki kali

dil lagi hai chahl hai aur har taraf hain qahqahe

hain ye bulbul is chaman ke kar rahe hain chahchahe

dil mein jazba hai jawan ho kar sabhi aage baDhen

azm hai ye jaan-o-dil se des ki KHidmat karen

amn-o-azadi ka hum paigham duniya ko sunaen

des ki apne baDai apne kaamon se dikhaen

farz apna hum karen dil se ada aur jaan se

ho wafadari hamari apne hindostan se

ek ek bachcha gai ho ilm ka charcha baDhe

ek ek bachcha dhani ho des ki sewa kare

ek ek bachcha rahe baDh chaDh ke gun aur gyan mein

ek se ek baDh kar dikhae aap ko wigyan mein

aao 'nayyar' des ke bachchon ki jhurmuT mein tum aao

aao aao nazm aazadi ki bachchon ko sunao

aao sab nara lagaen zindabaad hindostan

aao hum sab mil ke gaen zindabaad hindostan

zindabaad hindostan

zindabaad