aazadi ke baad

dosto aage baḌhā jamhūriyat kā kārvāñ

aaj zinda ho ga.ī hai 'azmat-e-hindostāñ

aa ga.ī hai aaj qadmoñ meñ bisāt-e-kahkashāñ

aur ye manzil nahīñ hai sirf manzil kā nishāñ

jā.eza lenā hai ab badle hue hālāt kā

zindagī kā vaqt kā kirdār kā jazbāt kā

sāmne hai mulk kī be-rozgārī kā savāl

ġhurbat-o-iflās kī āġhosh meñ haiñ māh-o-sāl

aaj bhī pardoñ meñ hai lailā-e-hastī kā jamāl

kitne dil maġhmūm haiñ kitnī tamanna haiñ niDhāl

haañ baḌho aage baḌho vo sāmne hai rahguzar

'azm-o-himmat ko banā leñ aaj apnā ham-safar

zindagī ko zindagī kā naam dene ke liye

rāhatoñ kā 'ishratoñ kā jaam dene ke liye

vaqt kā tārīḳh kā paiġhām dene ke liye

kāmrānī kā nayā in'ām dene ke liye

jazba-e-ḳhidmat ko ab bedār honā chāhiye

saḳht mehnat ke liye tayyār honā chāhiye

aaj bhī hālāt ko apne badal sakte haiñ ham

zindagānī ke na.e sāñchoñ meñ Dhal sakte haiñ ham

irtiqā kī raah par be-ḳhauf chal sakte haiñ ham

laḌkhaḌā kar bhī zamāne meñ sañbhal sakte haiñ ham

ho 'amal apnā har ik tanqīd kā ḳhud hī javāb

ḳhuld-zār-e-hind ko de kar bahāroñ kā shabāb

har taraf phailā.eñge 'ilm-o-hunar kī raushnī

san'atoñ ko baḳhsh deñge āb-o-tāb-e-zindagī

kār-ḳhānoñ se baḌhā.eñge vatan kī dilkashī

lahlahātī khetiyoñ meñ jhuum uThegī zindagī

gungunātī 'ishrateñ de kar dil-e-ġhamnāk ko

ham-navā apnā banā kar jur.at-e-be-bāk ko

'azm-o-istiqlāl se badleñge taqdīr-e-hayāt

koshish-e-paiham se ho saktī hai tā'mīr-e-hayāt

dekhte haiñ aaj bhī ham 'aks-e-tanvīr-e-hayāt

vo jo mustaqbil ke hāthoñ meñ hai tasvīr-e-hayāt

ek paiġhām-e-'amal ye vaqt kī raftār hai

dahr meñ rāz-e-taraqqī 'azmat-e-kirdār hai

dosto aage baDha jamhuriyat ka karwan

aaj zinda ho gai hai 'azmat-e-hindostan

aa gai hai aaj qadmon mein bisat-e-kahkashan

aur ye manzil nahin hai sirf manzil ka nishan

jaeza lena hai ab badle hue haalat ka

zindagi ka waqt ka kirdar ka jazbaat ka

samne hai mulk ki be-rozgari ka sawal

ghurbat-o-iflas ki aaghosh mein hain mah-o-sal

aaj bhi pardon mein hai laila-e-hasti ka jamal

kitne dil maghmum hain kitni tamanna hain niDhaal

han baDho aage baDho wo samne hai rahguzar

'azm-o-himmat ko bana len aaj apna ham-safar

zindagi ko zindagi ka nam dene ke liye

rahaton ka 'ishraton ka jam dene ke liye

waqt ka tariKH ka paigham dene ke liye

kaamrani ka naya in'am dene ke liye

jazba-e-KHidmat ko ab bedar hona chahiye

saKHt mehnat ke liye tayyar hona chahiye

aaj bhi haalat ko apne badal sakte hain hum

zindagani ke nae sanchon mein Dhal sakte hain hum

irtiqa ki rah par be-KHauf chal sakte hain hum

laDkhaDa kar bhi zamane mein sanbhal sakte hain hum

ho 'amal apna har ek tanqid ka KHud hi jawab

KHuld-zar-e-hind ko de kar bahaaron ka shabab

har taraf phailaenge 'ilm-o-hunar ki raushni

san'aton ko baKHsh denge aab-o-tab-e-zindagi

kar-KHanon se baDhaenge watan ki dilkashi

lahlahati khetiyon mein jhum uThegi zindagi

gungunati 'ishraten de kar dil-e-ghamnak ko

ham-nawa apna bana kar jurat-e-be-bak ko

'azm-o-istiqlal se badlenge taqdir-e-hayat

koshish-e-paiham se ho sakti hai ta'mir-e-hayat

dekhte hain aaj bhi hum 'aks-e-tanwir-e-hayat

wo jo mustaqbil ke hathon mein hai taswir-e-hayat

ek paigham-e-'amal ye waqt ki raftar hai

dahr mein raaz-e-taraqqi 'azmat-e-kirdar hai