aazadi se nindon tak

zindagī kī chaTTānoñ se

sazāoñ kā samundar Takrātā hai

aur safed chaTTāneñ samundar kī kaalī kar dene vaalī tāqat se be-ḳhabar

ḳhvāboñ ke ġhurūr se labrez haiñ

paanī chaTTānoñ meñ rāste banātā rahtā hai

aur aise meñ koī nahīñ jāntā

ham āzādī ke jog meñ

tanhā.ī ke kis kis jañgal meñ bhaTke haiñ

āzādī ke libās ko apnā badan samajh kar

vahshī sannāToñ kī aamad se be-ḳhabar

ham kahāñ kahāñ bhaTke haiñ

aur jab libās phaT jaate haiñ

ham in chiThḌoñ ko apne be-libās tanhā.iyoñ meñ

yuuñ chhupā lete haiñ

jaise zinda maañ kī āñkheñ murda bachche kī āḳhirī dīdār ko chhupā letī haiñ

to aise meñ samundar sailāb ho jaatā hai

aur safed chaTTāneñ

sazāoñ meñ dafn

apne alāva sab kuchh bhuul jaane par majbūr ho jaatī haiñ

ham sailāb meñ na bahe jaane kā dukh liye

nīndoñ tak aa jaate haiñ

aur ham chaTTānoñ se guzarne vaale paanī ke rāste band nahīñ kar sakte to

hañs dete haiñ

aur nīndoñ kī bhiik jam.a karte karte

vahshī sannāToñ kī aamad ke haul meñ

ham sonā bhuul jaate haiñ

zindagi ki chaTTanon se

sazaon ka samundar Takraata hai

aur safed chaTTanen samundar ki kali kar dene wali taqat se be-KHabar

KHwabon ke ghurur se labrez hain

pani chaTTanon mein raste banata rahta hai

aur aise mein koi nahin jaanta

hum aazadi ke jog mein

tanhai ke kis kis jangal mein bhaTke hain

aazadi ke libas ko apna badan samajh kar

wahshi sannaTon ki aamad se be-KHabar

hum kahan kahan bhaTke hain

aur jab libas phaT jate hain

hum in chiThDon ko apne be-libas tanhaiyon mein

yun chhupa lete hain

jaise zinda man ki aankhen murda bachche ki aaKHiri didar ko chhupa leti hain

to aise mein samundar sailab ho jata hai

aur safed chaTTanen

sazaon mein dafn

apne alawa sab kuchh bhul jaane par majbur ho jati hain

hum sailab mein na bahe jaane ka dukh liye

nindon tak aa jate hain

aur hum chaTTanon se guzarne wale pani ke raste band nahin kar sakte to

hans dete hain

aur nindon ki bhik jama karte karte

wahshi sannaTon ki aamad ke haul mein

hum sona bhul jate hain