aazar

kyā ḳhabar thī ye tire phuul se bhī nāzuk hoñT

zahr meñ Dūbeñge kumhlā.eñge murjhā.eñge

kis ko ma.alūm thā ye hashr tirī āñkhoñ kā

nuur ke sote bhī tārīkī meñ kho jā.eñge

terī ḳhāmosh vafāoñ kā sila kyā hogā

mere nā-karda gunāhoñ kī sazā kyā hogī

qahqahe hoñge ki ashkoñ kī tarannum-rezī

dil-e-vahshī tire jiine kī adā kyā hogī

koī uljhā huā naġhma koī suljhā huā giit

kaun jaane lab-e-shā.er kī navā kyā hogī

haañ magar dil hai ki dhaḌke hī chalā jaatā hai

is se baḌh kar koī tauhīn-e-vafā kyā hogī

aur ye shor garajte hue tūfānoñ kā

ek sailāb sisakte hue insānoñ kā

har taraf saikḌoñ bal khātī dhuveñ kī lahreñ

har taraf Dher jhulaste hue armānoñ kā

zindagī aur bhī kuchh ḳhvār huī jaatī hai

ab to jo saañs hai āzār huī jaatī hai

kya KHabar thi ye tere phul se bhi nazuk honT

zahr mein Dubenge kumhlaenge murjhaenge

kis ko malum tha ye hashr teri aankhon ka

nur ke sote bhi tariki mein kho jaenge

teri KHamosh wafaon ka sila kya hoga

mere na-karda gunahon ki saza kya hogi

qahqahe honge ki ashkon ki tarannum-rezi

dil-e-wahshi tere jine ki ada kya hogi

koi uljha hua naghma koi suljha hua git

kaun jaane lab-e-shaer ki nawa kya hogi

han magar dil hai ki dhaDke hi chala jata hai

is se baDh kar koi tauhin-e-wafa kya hogi

aur ye shor garajte hue tufanon ka

ek sailab sisakte hue insanon ka

har taraf saikDon bal khati dhuwen ki lahren

har taraf Dher jhulaste hue armanon ka

zindagi aur bhi kuchh KHwar hui jati hai

ab to jo sans hai aazar hui jati hai