ab kya karun

chhā ga.ī barsāt kī pahlī ghaTā ab kyā karūñ

ḳhauf thā jis kā vo aa pahuñchī balā ab kyā karūñ

hijr ko bahlā chalī thī garm mausam kī sumūm

nā-gahāñ chalne lagī ThanDī havā ab kyā karūñ

aañkh uThī hī thī ki abr-e-lāla-gūñ kī chhāñv meñ

dard se kahne lagā kuchh jhuTpuTā ab kyā karūñ

ashk abhī thamne na paa.e the ki bedardī ke saath

būñdiyoñ se bostāñ bajne lagā ab kyā karūñ

zaḳhm ab bharne na paa.e the ki bādal charḳh par

aa gayā añgḌā.iyāñ letā huā ab kyā karūñ

aa chukī thī niiñd sī ġham ko ki mausam nā-gahāñ

bahr-o-bar meñ karvaTeñ lene lagā ab kyā karūñ

charḳh kī be-rañgiyoñ se sust thī raftār-e-ġham

yak-ba-yak har zarra gulshan ban gayā ab kyā karūñ

qufl-e-bāb-e-shauq thiiñ māhaul kī ḳhāmoshiyāñ

daf.atan kāfir papīhā bol uThā ab kyā karūñ

hijr kā siine meñ kuchh kam ho chalā thā pech-o-tāb

baal bikhrāne lagī kaalī ghaTā ab kyā karūñ

aañkh jhapkāne lagī thī dil meñ yād-e-lahn-e-yād

mor kī aane lagī ban se sadā ab kyā karūñ

ghaT chalā thā ġham kī rañgīñ badliyoñ kī aaḌ se

un kā chehra sāmne aane lagā ab kyā karūñ

aa rahī haiñ abr se un kī sadā.eñ 'josh' 'josh'

ai ḳhudā ab kyā karūñ bār-e-ḳhudā ab kyā karūñ

chha gai barsat ki pahli ghaTa ab kya karun

KHauf tha jis ka wo aa pahunchi bala ab kya karun

hijr ko bahla chali thi garm mausam ki sumum

na-gahan chalne lagi ThanDi hawa ab kya karun

aankh uThi hi thi ki abr-e-lala-gun ki chhanw mein

dard se kahne laga kuchh jhuTpuTa ab kya karun

ashk abhi thamne na pae the ki bedardi ke sath

bundiyon se bostan bajne laga ab kya karun

zaKHm ab bharne na pae the ki baadal charKH par

aa gaya angDaiyan leta hua ab kya karun

aa chuki thi nind si gham ko ki mausam na-gahan

bahr-o-bar mein karwaTen lene laga ab kya karun

charKH ki be-rangiyon se sust thi raftar-e-gham

yak-ba-yak har zarra gulshan ban gaya ab kya karun

qufl-e-bab-e-shauq thin mahaul ki KHamoshiyan

dafatan kafir papiha bol uTha ab kya karun

hijr ka sine mein kuchh kam ho chala tha pech-o-tab

baal bikhrane lagi kali ghaTa ab kya karun

aankh jhapkane lagi thi dil mein yaad-e-lahn-e-yaad

mor ki aane lagi ban se sada ab kya karun

ghaT chala tha gham ki rangin badliyon ki aaD se

un ka chehra samne aane laga ab kya karun

aa rahi hain abr se un ki sadaen 'josh' 'josh'

ai KHuda ab kya karun bar-e-KHuda ab kya karun