abba ka chaaliswan

būḌhe ġharīb baap ke marne pe daf.atan

beTe ne sochā kaise karūñ dafn aur kafan

apne yahāñ to maut meñ ḳharche kā hai chalan

ġham se niDhāl beTe ke māthe pe thī shikan

jo kuchh thā paas dafn-o-kafan meñ uThā diyā

ḳharche ne phir to maut kā sadma bhulā diyā

karnā paḌā jo dafan kā tā-sub.h intizār

mayyat ke paas chaltī rahī chaa.e baar baar

aur maut meñ jo aa.e the bairūnī rishta-dār

chaa.e se un kī toḌā gayā niiñd kā ḳhumār

aur is ke ba.ad chaltā jo phir pandān hai

lagtā hai sogvār nahīñ mezbān hai

purse ko sub.h shaam phir aate haiñ rishta-dār

khānā nahīñ to chaa.e kam-az-kam ho ek baar

chaa.e ke saath vaa.e meñ ḳharche haiñ be-shumār

murde ko chhoḌ ḳharche ko rotā hai sogvār

tiije ke ba.ad dasvāñ hai phir bīsvāñ bhī hai

phir chand roz ba.ad hī chālīsvāñ bhī hai

har roz fātiha ke liye gosht chāhiye

sālan bhī sirf ek nahīñ do pakā.iye

nazr-o-niyāz ke liye halva banā.iye

phir roz aane vāloñ ko chaa.e pilā.iye

beTā bichāra dab gayā qarze ke baar se

barsoñ tak ab chhuḌā.egā pīchhā udhār ke

phir is ke ba.ad bāteñ banātī haiñ aurteñ

kyā kyā kamī rahī ye batātī haiñ aurteñ

chālīsvāñ kuchh aise karātī haiñ aurteñ

farmā.ishoñ ke Dher lagātī haiñ aurteñ

is tarah maut ko bhī tamāsha banā diyā

vo e'tirāz uThā.e kaleja hilā diyā

beTe ne naam kar diyā raushan jahān meñ

aisī kisī ne maut na kī ḳhāndān meñ

chālīsvāñ kuchh aisā kiyā ān-bān meñ

zevar bahū kā bik gayā masnūī shaan meñ

vo maut kī ki kumbe meñ Dañkā bajā diyā

chālīsveñ pe shahr ko khānā khilā diyā

buDhe gharib bap ke marne pe dafatan

beTe ne socha kaise karun dafn aur kafan

apne yahan to maut mein KHarche ka hai chalan

gham se niDhaal beTe ke mathe pe thi shikan

jo kuchh tha pas dafn-o-kafan mein uTha diya

KHarche ne phir to maut ka sadma bhula diya

karna paDa jo dafan ka ta-subh intizar

mayyat ke pas chalti rahi chae bar bar

aur maut mein jo aae the bairuni rishta-dar

chae se un ki toDa gaya nind ka KHumar

aur is ke baad chalta jo phir pandan hai

lagta hai sogwar nahin mezban hai

purse ko subh sham phir aate hain rishta-dar

khana nahin to chae kam-az-kam ho ek bar

chae ke sath wae mein KHarche hain be-shumar

murde ko chhoD KHarche ko rota hai sogwar

tije ke baad daswan hai phir biswan bhi hai

phir chand roz baad hi chaaliswan bhi hai

har roz fatiha ke liye gosht chahiye

salan bhi sirf ek nahin do pakaiye

nazr-o-niyaz ke liye halwa banaiye

phir roz aane walon ko chae pilaiye

beTa bichaara dab gaya qarze ke bar se

barson tak ab chhuDaega pichha udhaar ke

phir is ke baad baaten banati hain aurten

kya kya kami rahi ye batati hain aurten

chaaliswan kuchh aise karaati hain aurten

farmaishon ke Dher lagati hain aurten

is tarah maut ko bhi tamasha bana diya

wo e'tiraaz uThae kaleja hila diya

beTe ne nam kar diya raushan jahan mein

aisi kisi ne maut na ki KHandan mein

chaaliswan kuchh aisa kiya aan-ban mein

zewar bahu ka bik gaya masnui shan mein

wo maut ki ki kumbe mein Danka baja diya

chaaliswen pe shahr ko khana khila diya