abba ke nam

is lamhe

ki tum mere saath ho

ḳhudā mere nazdīk hai

maiñ us ke qadmoñ par sar rakh detā huuñ

apnī kamyoñ, bad-nasīboñ aur be-vaqūfiyoñ ko bhuul kar

us ke shafqat bhare hāthoñ kā lams

apnī piiTh par mahsūs kartā huuñ

dekhte dekhte

harā-bharā daraḳht ban jaatā huuñ

jaise

meñ ek nahīñ, ka.ī zindagī jī rahā huuñ

jaise

maiñ ek nahī, ka.ī ashiyā meñ badal gayā huuñ

chhoTe se chhoTe zarre meñ

kā.enāt kī kā.enāt sarsarātī hai

tamām rāste

mujhe apnī taraf aate hue dikhā.ī dete haiñ

lagtā hai

thoḌī der ke liye zamīn ruk ga.ī hai

logoñ ne

apnī nafrateñ

apnī jeboñ meñ bhar lī haiñ

aur mujhe

ḳhush-āmdīd kah rahe haiñ

is lamhe

ki tum mere sath ho

KHuda mere nazdik hai

main us ke qadmon par sar rakh deta hun

apni kamyon, bad-nasibon aur be-waqufiyon ko bhul kar

us ke shafqat bhare hathon ka lams

apni piTh par mahsus karta hun

dekhte dekhte

hara-bhara daraKHt ban jata hun

jaise

mein ek nahin, kai zindagi ji raha hun

jaise

main ek nahi, kai ashiya mein badal gaya hun

chhoTe se chhoTe zarre mein

kaenat ki kaenat sarsaraati hai

tamam raste

mujhe apni taraf aate hue dikhai dete hain

lagta hai

thoDi der ke liye zamin ruk gai hai

logon ne

apni nafraten

apni jebon mein bhar li hain

aur mujhe

KHush-amdid kah rahe hain