abhi hum KHub-surat hain

abhī ham ḳhūb-sūrat haiñ

hamāre jism aurāq-e-ḳhizānī ho ga.e haiñ

aur ridā-e-zaḳhm se ārāsta haiñ

phir bhī dekho to

hamārī ḳhush-numā.ī par koī harf

aur kashīda-qāmtī meñ ḳham nahīñ aayā

hamāre hoñT zahrīlī rutoñ se kāsnī haiñ

aur chehre ratjagoñ kī sho.alagī se

ābnūsī ho chuke haiñ

aur zaḳhmī ḳhvāb

nādīda jazīroñ kī zamīñ par

is tarah bikhre paḌe haiñ

jis tarah tūfāñ-zada kashtī ke TukḌoñ ko

samundar sāhiloñ par pheñk detā hai

lahū kī bārisheñ

yā ḳhud-kushī kī ḳhvāhisheñ thiiñ

is aziyyat ke safar meñ

kaun sā mausam nahīñ aayā

magar āñkhoñ meñ nam

lahje meñ sam

hoñToñ pe koī naġhma-e-mātam nahīñ aayā

abhī tak dil hamāre

ḳhanda-e-tiflāñ kī sūrat be-kudūrat haiñ

abhī ham ḳhūb-sūrat haiñ

zamāne ho ga.e

ham kū-e-jānāñ chhoḌ aa.e the

magar ab bhī

bahut se āshnā nā-āshnā hamdam

aur un kī yaad ke mānūs qāsid

aur un kī chāhatoñ ke hijr-nāme

duur desoñ se hamārī or aate haiñ

gulābī mausamoñ kī dhuup

jab naurasta sabze par qadam rakhtī huī

ma.mūra-e-tan meñ dar aatī hai

tū barfānī badan meñ

jū-e-ḳhūñ āhistagī se gungunātī hai

udāsī kā parinda

chup ke jañgal meñ

sar-e-shāḳh-e-nihāl-e-ġham chahaktā hai

koī bhūlā huā bisrā huā dukh

aabla bin kar Tapaktā hai

to yuuñ lagtā hai

jaise harf apne

zinda āvāzoñ kī sūrat haiñ

abhī ham ḳhūb-sūrat haiñ

hamārī ḳhush-numā.ī harf-e-haq kī rū-numā.ī hai

usī ḳhātir to ham āshufta-jāñ

ushshāq kī yādoñ meñ rahte haiñ

ki jo un par guzartī hai vo kahte haiñ

hamārī harf-sāzī

ab bhī mahbūb-e-jahāñ hai

shā.erī shorīd-gān-e-ishq ke vird-e-zabāñ hai

aur gulāboñ kī tarah shādāñ chehre

la.al o marjāñ kī tarah lab

sandalīñ hāthoñ se

chāhat aur aqīdat kī bayāzoñ par

hamāre naam likhte haiñ

sabhī dard-āshnā

īsār mashrab

ham-nafas ahl-e-qafas

jab maqtaloñ kī samt jaate haiñ

hamāre bait gaate haiñ

abhī tak naaz karte haiñ sab ahl-e-qāfila

apne hudī-ḳhvānoñ par āshufta-kalāmoñ par

abhī ham dastaḳhat karte haiñ apne qatl-nāmoñ par

abhī ham āsmānoñ kī amānat

aur zamīnoñ kī zarūrat haiñ

abhī ham ḳhūb-sūrat haiñ

abhi hum KHub-surat hain

hamare jism auraq-e-KHizani ho gae hain

aur rida-e-zaKHm se aarasta hain

phir bhi dekho to

hamari KHush-numai par koi harf

aur kashida-qamti mein KHam nahin aaya

hamare honT zahrili ruton se kasni hain

aur chehre ratjagon ki shoalagi se

aabnusi ho chuke hain

aur zaKHmi KHwab

nadida jaziron ki zamin par

is tarah bikhre paDe hain

jis tarah tufan-zada kashti ke TukDon ko

samundar sahilon par phenk deta hai

lahu ki barishen

ya KHud-kushi ki KHwahishen thin

is aziyyat ke safar mein

kaun sa mausam nahin aaya

magar aankhon mein nam

lahje mein sam

honTon pe koi naghma-e-matam nahin aaya

abhi tak dil hamare

KHanda-e-tiflan ki surat be-kudurat hain

abhi hum KHub-surat hain

zamane ho gae

hum ku-e-jaanan chhoD aae the

magar ab bhi

bahut se aashna na-ashna hamdam

aur un ki yaad ke manus qasid

aur un ki chahaton ke hijr-name

dur deson se hamari or aate hain

gulabi mausamon ki dhup

jab naurasta sabze par qadam rakhti hui

mamura-e-tan mein dar aati hai

tu barfani badan mein

ju-e-KHun aahistagi se gungunati hai

udasi ka parinda

chup ke jangal mein

sar-e-shaKH-e-nihaal-e-gham chahakta hai

koi bhula hua bisra hua dukh

aabla bin kar Tapakta hai

to yun lagta hai

jaise harf apne

zinda aawazon ki surat hain

abhi hum KHub-surat hain

hamari KHush-numai harf-e-haq ki ru-numai hai

usi KHatir to hum aashufta-jaan

ushshaq ki yaadon mein rahte hain

ki jo un par guzarti hai wo kahte hain

hamari harf-sazi

ab bhi mahbub-e-jahan hai

shaeri shorid-gan-e-ishq ke wird-e-zaban hai

aur gulabon ki tarah shadan chehre

lal o marjaan ki tarah lab

sandalin hathon se

chahat aur aqidat ki bayazon par

hamare nam likhte hain

sabhi dard-ashna

isar mashrab

ham-nafas ahl-e-qafas

jab maqtalon ki samt jate hain

hamare bait gate hain

abhi tak naz karte hain sab ahl-e-qafila

apne hudi-KHwanon par aashufta-kalamon par

abhi hum dastaKHat karte hain apne qatl-namon par

abhi hum aasmanon ki amanat

aur zaminon ki zarurat hain

abhi hum KHub-surat hain