abhi kuchh din lagenge

abhī kuchh din lageñge ḳhvāb ko ta.abīr hone meñ

kisī ke dil meñ apne naam kī sham.a jalāne meñ

kisī ke shahr ko daryāft karne meñ

kisī anmol saa.at meñ kisī nārāz sāthī ko zarā sā paas laane meñ

abhī kuchh din lageñge

dard kā parcham banāne meñ

purāne zaḳhm pe marham lagāne meñ

mohabbat kī kavitā ko havā ke ruḳh pe laane meñ

purānī nafratoñ ko bhuul jaane meñ

abhī kuchh din lageñge

raat kī dīvār meñ ik dar banāne meñ

muqaddar meñ lagī ik gāñTh ko āzād karne meñ

na.e kuchh marhale tasḳhīr karne meñ

mire 'ġhālib', mire 'tagore' ko apnā banāne meñ

abhī kuchh din lageñge

dasht meñ phūloñ kā gul-dasta sajāne meñ

abhī kuchh din lageñge

magar ye din ziyāda to nahīñ hoñge

bas ik mausam kī duurī par

kahīñ ham tum mileñge

bas ik saa.at kī nazdīkī meñ

bāham mashvare hoñge

bas ik guzre hue kal se pare

ham paas baiTheñge

bahut sā daras sah leñge

bahut sī baat kar leñge!

abhi kuchh din lagenge KHwab ko tabir hone mein

kisi ke dil mein apne nam ki shama jalane mein

kisi ke shahr ko daryaft karne mein

kisi anmol saat mein kisi naraaz sathi ko zara sa pas lane mein

abhi kuchh din lagenge

dard ka parcham banane mein

purane zaKHm pe marham lagane mein

mohabbat ki kawita ko hawa ke ruKH pe lane mein

purani nafraton ko bhul jaane mein

abhi kuchh din lagenge

raat ki diwar mein ek dar banane mein

muqaddar mein lagi ek ganTh ko aazad karne mein

nae kuchh marhale tasKHir karne mein

mere 'ghaalib', mere 'tagore' ko apna banane mein

abhi kuchh din lagenge

dasht mein phulon ka gul-dasta sajaane mein

abhi kuchh din lagenge

magar ye din ziyaada to nahin honge

bas ek mausam ki duri par

kahin hum tum milenge

bas ek saat ki nazdiki mein

baham mashware honge

bas ek guzre hue kal se pare

hum pas baiThenge

bahut sa daras sah lenge

bahut si baat kar lenge!