abhi mujhse kisi ko mohabbat nahin hui

abhī mujh se kisī ko mohabbat nahīñ huī

so dil ke baaġh meñ phuul bhī nahīñ khile

mujhe har aurat ke siine par pistān

aur rānoñ ke biich qaus nazar aatī hai

abhī mohabbat shurūa nahīñ huī

maiñ har ham-bistarī ke baad be-zār

aur phir se is kaam par tayyār ho jaatā huuñ

pistānoñ aur rānoñ meñ

mohabbat talāsh karne ke kār-e-be-sūd meñ masrūf

mohabbat ke mausam tak

ishrat ke raste jaayā jā saktā

to kab kā pahuñch gayā hotā

nazar kartā huuñ to lagtā hai

zindagī se kuchh aur bhī duur nikal aaya huuñ

mujhe maut se Dar lagne lagā hai

kyoñ ki abhī mujh se kisī ko mohabbat nahīñ huī

qatl-e-ām jaarī hai

agle paḌāv tak

kār-e-mohabbat mauqūf

qismat ko kāġhaz ke TukḌoñ

aur bārūd se munsalik kar diyā gayā hai

ābādī kā mas.ala darpesh hai

mohabbat ko kisī fāriġh vaqt par uThā diyā gayā hai

bahār aane tak

ye mausam to tai karnā paḌegā

abhi mujh se kisi ko mohabbat nahin hui

so dil ke bagh mein phul bhi nahin khile

mujhe har aurat ke sine par pistan

aur ranon ke bich qaus nazar aati hai

abhi mohabbat shurua nahin hui

main har ham-bistari ke baad be-zar

aur phir se is kaam par tayyar ho jata hun

pistanon aur ranon mein

mohabbat talash karne ke kar-e-be-sud mein masruf

mohabbat ke mausam tak

ishrat ke raste jaya ja sakta

to kab ka pahunch gaya hota

nazar karta hun to lagta hai

zindagi se kuchh aur bhi dur nikal aaya hun

mujhe maut se Dar lagne laga hai

kyon ki abhi mujh se kisi ko mohabbat nahin hui

qatl-e-am jari hai

agle paDaw tak

kar-e-mohabbat mauquf

qismat ko kaghaz ke TukDon

aur barud se munsalik kar diya gaya hai

aabaadi ka masala darpesh hai

mohabbat ko kisi farigh waqt par uTha diya gaya hai

bahaar aane tak

ye mausam to tai karna paDega