abu-talib ke beTe

jabīn-e-vaqt par likkhī huī sachchā.iyāñ raushan rahī haiñ

tā-abad raushan raheñgī

ḳhudā shāhid hai aur vo zaat shāhid hai ki jo vaj.h-e-asās-e-anafas-o-āfāq hai

aur ḳhair kī tārīḳh kā vo bāb-e-avval hai

abad tak jis kā faizān-e-karam jaarī rahegā

yaqīñ ke āgahī ke raushnī ke qāfile har daur meñ aate rahe haiñ

tā-abad aate raheñge

abū-tālib ke beTe hifz-e-nāmūs-e-risālat kī rivāyat ke amiiñ the

jaan denā jānte the

vo muslim hoñ ki vo abbās hoñ aun o mohamād hoñ alī-akbar hoñ qāsim hoñ alī-asġhar hoñ

haq pahchānte the

lashkar-e-bātil ko kab gardānte the

abū-tālib ke beTe sar-burīda ho ke bhī ailān-e-haq karte rahe haiñ

abū-tālib ke beTe pā-ba-jaulāñ ho ke bhī ailān-e-haq karte rahe haiñ

abū-tālib ke beTe sarf-e-zindāñ ho ke bhī ailān-e-haq karte rahe haiñ

madīna ho najaf ho karbalā ho kāzimain o sāmira ho mash.had o baġhdād ho

āl-e-abū-tālib ke qadmoñ ke nishāñ

insāniyat ko us kī manzil kā pata dete rahe haiñ tā-abad dete raheñge

abū-tālib ke beToñ aur ġhulmān-e-alī-ibn-e-abī-tālib meñ ik nisbat rahī hai

mohabbat kī ye nisbat umar bhar qaa.em rahegī

tā-abad qaa.em rahegī

jabin-e-waqt par likkhi hui sachchaiyan raushan rahi hain

ta-abad raushan rahengi

KHuda shahid hai aur wo zat shahid hai ki jo wajh-e-asas-e-anafas-o-afaq hai

aur KHair ki tariKH ka wo bab-e-awwal hai

abad tak jis ka faizan-e-karam jari rahega

yaqin ke aagahi ke raushni ke qafile har daur mein aate rahe hain

ta-abad aate rahenge

abu-talib ke beTe hifz-e-namus-e-risalat ki riwayat ke amin the

jaan dena jaante the

wo muslim hon ki wo abbas hon aun o mohamad hon ali-akbar hon qasim hon ali-asghar hon

haq pahchante the

lashkar-e-baatil ko kab gardante the

abu-talib ke beTe sar-burida ho ke bhi ailan-e-haq karte rahe hain

abu-talib ke beTe pa-ba-jaulan ho ke bhi ailan-e-haq karte rahe hain

abu-talib ke beTe sarf-e-zindan ho ke bhi ailan-e-haq karte rahe hain

madina ho najaf ho karbala ho kazimain o samira ho mashhad o baghdad ho

aal-e-abu-talib ke qadmon ke nishan

insaniyat ko us ki manzil ka pata dete rahe hain ta-abad dete rahenge

abu-talib ke beTon aur ghulman-e-ali-ibn-e-abi-talib mein ek nisbat rahi hai

mohabbat ki ye nisbat umar bhar qaem rahegi

ta-abad qaem rahegi