accident

mujh se roz yahī kahtā hai pakkī saḌak par vo kaalā sā daaġh jo kuchh din pahle

surḳh lahū kā thā ik chhīñTā chiknā giilā chamkīlā chamkīlā

miTTī us pe girī aur mailī sī ik pīḌhī us par se utrī

aur phir sindūrī sā ik ḳhāka ubhrā

jo ab pakkī saḌak par kaalā sā dhabba hai

pisī huī bajrī meñ jazb aur jāmid an-miT

mujh se roz yahī kahtā hai pakkī saḌak par maslā huā vo daaġh lahū kā

maiñ ne to pahlī baar us din

apnī rañg-birañgī qāshoñ vaalī geñd ke pīchhe

yuuñ hī zarā ik jast-bharī thī

abhī to merā roġhan bhī kachchhā thā

kis ne uñDel diyā yuuñ mujh ko is miTTī par

uuñ uuñ maiñ nahīñ miTtā maiñ to huuñ ab bhī huuñ

maiñ ye sun kar Dar jaatā huuñ

kaalī bajrī ke roġhan meñ jiine vaale is ma.asūm lahū kī kaun sunegā

mamtā bik bhī chukī hai chand Takoñ meñ

qānūn āñkheñ mīche hue hai

qātil pahiye be-pahrā haiñ

mujh se roz yahi kahta hai pakki saDak par wo kala sa dagh jo kuchh din pahle

surKH lahu ka tha ek chhinTa chikna gila chamkila chamkila

miTTi us pe giri aur maili si ek piDhi us par se utri

aur phir sinduri sa ek KHaka ubhra

jo ab pakki saDak par kala sa dhabba hai

pisi hui bajri mein jazb aur jamid an-miT

mujh se roz yahi kahta hai pakki saDak par masla hua wo dagh lahu ka

main ne to pahli bar us din

apni rang-birangi qashon wali gend ke pichhe

yun hi zara ek jast-bhari thi

abhi to mera roghan bhi kachchha tha

kis ne unDel diya yun mujh ko is miTTi par

un un main nahin miTta main to hun ab bhi hun

main ye sun kar Dar jata hun

kali bajri ke roghan mein jine wale is masum lahu ki kaun sunega

mamta bik bhi chuki hai chand Takon mein

qanun aankhen miche hue hai

qatil pahiye be-pahra hain