achaar ka martaban

tumhārī ammī ne apnī izzat ko martabānoñ meñ band kar ke

makāñ kī chhat se laTakte chhīñke meñ rakh diyā thā

tumhārī ammī ne bār-hā tum se ye kahā thā

''achār kachchā hai' tel kī bū miTī nahīñ hai

abhī na ye martabān kholo

havā agar bartanoñ meñ dāḳhil huī to ullī

tamām phāñkoñ kā naas kar degī''

tum magar soch meñ paḌī ho

''na jaane ammī ko kyā huā hai

achār kī phāñk hī to hai nā

na koī hīrā, na koī motī, na koī sone kī chiiz māñgī

na koī kapḌā na koī lattā na koī sāḌī''

tum apnī ma.asūm aur pyārī sī añkhḌiyoñ meñ

hazār shikve liye yūñhī sochtī rahogī

magar jo ek Dar tumhārī ammī kī aañkh meñ aa ke bas gayā hai

use kahāñ tum samajh sakogī

abhī to tum bachpane kī sarhad phalāñgne hī kī fikr meñ ho

abhī to tum meñDhiyāñ banātī ho, choTiyāñ kas ke bāñdhtī ho

kabhī kabhī tum saḌak pe jā kar jhagaḌte bachchoñ ko DāñTtī ho

to tum ko chunnī kā hosh hotā hai

aur na āñkhoñ meñ Dar kisī kā

agar kabhī tum zabān kā zā.iqa badalne kā soch hī lo

agar kabhī tum achār kā martabān nīche utaar hī lo

nazar bachā kar achār bāhar nikāl hī lo

to lamha bhar ke liye Thahar kar ye soch lenā

tumhārī ammī ne apnī izzat ko martabānoñ meñ band kar ke

makāñ kī chhat se laTakte chhīñke meñ rakh diyā thā

tumhaari ammi ne apni izzat ko martabanon mein band kar ke

makan ki chhat se laTakte chhinke mein rakh diya tha

tumhaari ammi ne bar-ha tum se ye kaha tha

achaar kachcha hai' tel ki bu miTi nahin hai

abhi na ye martaban kholo

hawa agar bartanon mein daKHil hui to ulli

tamam phankon ka nas kar degi

tum magar soch mein paDi ho

na jaane ammi ko kya hua hai

achaar ki phank hi to hai na

na koi hira, na koi moti, na koi sone ki chiz mangi

na koi kapDa na koi latta na koi saDi

tum apni masum aur pyari si ankhDiyon mein

hazar shikwe liye yunhi sochti rahogi

magar jo ek Dar tumhaari ammi ki aankh mein aa ke bas gaya hai

use kahan tum samajh sakogi

abhi to tum bachpane ki sarhad phalangne hi ki fikr mein ho

abhi to tum meinDhiyan banati ho, choTiyan kas ke bandhti ho

kabhi kabhi tum saDak pe ja kar jhagaDte bachchon ko DanTti ho

to tum ko chunni ka hosh hota hai

aur na aankhon mein Dar kisi ka

agar kabhi tum zaban ka zaiqa badalne ka soch hi lo

agar kabhi tum achaar ka martaban niche utar hi lo

nazar bacha kar achaar bahar nikal hi lo

to lamha bhar ke liye Thahar kar ye soch lena

tumhaari ammi ne apni izzat ko martabanon mein band kar ke

makan ki chhat se laTakte chhinke mein rakh diya tha