achchhi kitab

dostoñ meñ sab se achchhā dost hai achchhī kitāb

aa batā duuñ kaisī hotī hai 'atā' achchhī kitāb

har qadam par nek-o-bad kā farq batlātī hai ye

har qadam ko sīdhī-sachchī raah dikhlātī hai ye

dīn-o-duniyā kā hamesha ham ko detī hai sabaq

raushnī hī raushnī detā hai is kā har varaq

sīkhtī hai is se duniyā kāmrānī kā hunar

ye atā kartī hai sab ko zindagānī kā hunar

sahl ho jaatī haiñ is se vaqt kī bārīkiyāñ

duur kartī hai ye sab ke zehn kī tārīkiyāñ

zindagī ke imtihāñ meñ hausla detī hai ye

chāhne vāloñ ko ūñchā martaba detī hai ye

is kī sohbat se farozāñ aaj sham-e-e'tibār

is kī ulfat se daraḳhshāñ aaj husn-e-iḳhtiyār

zindagī paatī hai is se aap ḳhud apnī ḳhabar

zindagī paatī hai is se ik maqām-e-mo.atabar

baḳhshtī hai ye basārat aur basīrat bhī hameñ

taaki dikhlā.ī paḌe shai kī haqīqat bhī hameñ

ye hameñ batlātī hai ham kyā haiñ aur duniyā hai kyā

ye hameñ batlātī hai rab kaun hai uqbā hai kyā

is ke dāman meñ haiñ pinhāñ har zamāne ke uluum

is ke āñgan meñ haiñ raqsāñ chāñd sūraj aur nujūm

is ke jalve se huvaidā ma.arifat kī daulateñ

nuur se is ke huā insān kā irfāñ hameñ

is ke dam se ham pe vāzeh uqda-e-marg-o-hayāt

is ke dam se ham pe raushan hai jahān-e-kā.enāt

is qadar jāma.a mukammal haiñ 'atā' is kī sifāt

kab hai mumkin pesh karnā ai 'atā' is kī sifāt

doston mein sab se achchha dost hai achchhi kitab

aa bata dun kaisi hoti hai 'ata' achchhi kitab

har qadam par nek-o-bad ka farq batlati hai ye

har qadam ko sidhi-sachchi rah dikhlati hai ye

din-o-duniya ka hamesha hum ko deti hai sabaq

raushni hi raushni deta hai is ka har waraq

sikhti hai is se duniya kaamrani ka hunar

ye ata karti hai sab ko zindagani ka hunar

sahl ho jati hain is se waqt ki barikiyan

dur karti hai ye sab ke zehn ki tarikiyan

zindagi ke imtihan mein hausla deti hai ye

chahne walon ko uncha martaba deti hai ye

is ki sohbat se farozan aaj sham-e-e'tibar

is ki ulfat se daraKHshan aaj husn-e-iKHtiyar

zindagi pati hai is se aap KHud apni KHabar

zindagi pati hai is se ek maqam-e-moatabar

baKHshti hai ye basarat aur basirat bhi hamein

taki dikhlai paDe shai ki haqiqat bhi hamein

ye hamein batlati hai hum kya hain aur duniya hai kya

ye hamein batlati hai rab kaun hai uqba hai kya

is ke daman mein hain pinhan har zamane ke ulum

is ke aangan mein hain raqsan chand suraj aur nujum

is ke jalwe se huwaida marifat ki daulaten

nur se is ke hua insan ka irfan hamein

is ke dam se hum pe wazeh uqda-e-marg-o-hayat

is ke dam se hum pe raushan hai jahan-e-kaenat

is qadar jama mukammal hain 'ata' is ki sifat

kab hai mumkin pesh karna ai 'ata' is ki sifat