aDe kabutar uDe KHayal

ik bosīda masjid meñ

dīvāroñ mehrāboñ par

aur kabhī chhat kī jānib

merī āñkheñ ghuum rahī haiñ

jaane kis ko DhūñD rahī haiñ

merī āñkheñ ruk jaatī haiñ

lohe ke us ḳhālī hook par

jo ḳhālī ḳhālī nazroñ se

har ik chehra dekh rahā hai

ik aise insān kā shāyad

jo ik pañkhā le aa.egā

lā.egā aur duur karegā

masjid kī be-sāmānī ko

ḳhālī hook kī vīrānī par

maiñ ne jab us hook ko dekhā

merī nannhī phuul sī beTī

merī āñkhoñ meñ dauḌ aa.ī

bholī maañ ne us kī

apnī pyārī rāj-dulārī beTī ke

donoñ kānoñ ko

apne hāthoñ se chhed diyā hai

phūloñ jaise kānoñ meñ phir

niim ke tinke Daal diye haiñ

ummīdoñ aasoñ ke sahāre

dil hī dil meñ soch rahī hai

jab ham ko allāh hamārā

thoḌā sā bhī paisa degā

beTī ke kānoñ meñ us din

bāliyāñ hoñgī bunde hoñge

maiñ ne anthak mehnat kar ke

pañkhā ek ḳharīd liyā hai

masjid ke is ḳhālī hook ko

maiñ ne pañkhā sauñp diyā hai

hook meñ pañkhā dekh ke mujh ko

hotā hai mahsūs ki jaise

merī beTī bāliyāñ pahne

ghar kī chhat par ghuum rahī hai

ek bosida masjid mein

diwaron mehrabon par

aur kabhi chhat ki jaanib

meri aankhen ghum rahi hain

jaane kis ko DhunD rahi hain

meri aankhen ruk jati hain

lohe ke us KHali hook par

jo KHali KHali nazron se

har ek chehra dekh raha hai

ek aise insan ka shayad

jo ek pankha le aaega

laega aur dur karega

masjid ki be-samani ko

KHali hook ki virani par

main ne jab us hook ko dekha

meri nannhi phul si beTi

meri aankhon mein dauD aai

bholi man ne us ki

apni pyari raj-dulari beTi ke

donon kanon ko

apne hathon se chhed diya hai

phulon jaise kanon mein phir

nim ke tinke Dal diye hain

ummidon aason ke sahaare

dil hi dil mein soch rahi hai

jab hum ko allah hamara

thoDa sa bhi paisa dega

beTi ke kanon mein us din

baaliyan hongi bunde honge

main ne anthak mehnat kar ke

pankha ek KHarid liya hai

masjid ke is KHali hook ko

main ne pankha saunp diya hai

hook mein pankha dekh ke mujh ko

hota hai mahsus ki jaise

meri beTi baaliyan pahne

ghar ki chhat par ghum rahi hai