adhuri nasl ka pura sach

umr kā sūraj sivā neze pe aayā

garm shiryānoñ meñ bahte ḳhuun kā dariyā bhañvar hone lagā

halqa-e-mauj-e-havā kaafī nahīñ

vahshat-e-abr-e-badan ke vāste

āġhosh koī aur ho

varna yuuñ murda saḌak ke ḳhvāb-āvar se kināre

be-ḳhayālī meñ kisī thūke hue bachche kī uljhī saañs meñ lipTī huī ye zindagī!

zehn par bār-e-girāñ band qabā ke lams kā ehsās bhī

aur shahr-e-habs meñ rasta koī khultā nahīñ

shāḳh tanhā se biiye kā ghoñsla girtā nahīñ

vahshat-e-abr-e-badan kī ḳhushk-sālī

ek chullū lams ke paanī kī muhtāj ko rotī hai

magar!

dekhnā āvāra kirneñ dekhnā

jin ko rastoñ meñ bikhartī

titliyoñ sī laḌkiyoñ ke zer jāmoñ

aur shīrīñ jism ke halke masāmoñ tak safar kā izn hai

umr kā sūraj sivā neze pe aayā

ab kitāboñ, taḳhtiyoñ kī be-mazā chhāñv tale ghuTtā hai dam

ab badan chhuptā nahīñ aḳhbār ke malbūs meñ

ab faqat uryāniyāñ

lekin

yaqīnan

maar Dālegī kahīñ

in bhare shahroñ kī tanhā.ī hameñ

umr ka suraj siwa neze pe aaya

garm shiryanon mein bahte KHun ka dariya bhanwar hone laga

halqa-e-mauj-e-hawa kafi nahin

wahshat-e-abr-e-badan ke waste

aaghosh koi aur ho

warna yun murda saDak ke KHwab-awar se kinare

be-KHayali mein kisi thuke hue bachche ki uljhi sans mein lipTi hui ye zindagi!

zehn par bar-e-giran band qaba ke lams ka ehsas bhi

aur shahr-e-habs mein rasta koi khulta nahin

shaKH tanha se biye ka ghonsla girta nahin

wahshat-e-abr-e-badan ki KHushk-sali

ek chullu lams ke pani ki muhtaj ko roti hai

magar!

dekhna aawara kirnen dekhna

jin ko raston mein bikharti

titliyon si laDkiyon ke zer jamon

aur shirin jism ke halke masamon tak safar ka izn hai

umr ka suraj siwa neze pe aaya

ab kitabon, taKHtiyon ki be-maza chhanw tale ghuTta hai dam

ab badan chhupta nahin aKHbar ke malbus mein

ab faqat uryaniyan

lekin

yaqinan

mar Dalegi kahin

in bhare shahron ki tanhai hamein