afsana-e-shab-rang

āriz-e-gul pe laraztī huī bekal shabnam

muntazir hai ki chale bād-e-sahar

koī jhoñkā

koī sūraj kī kiran

paas aa jaa.e to afsāna-e-shab-rañg sune

naġhma-e-zahra-o-nāhīd kī jhankār sune

barbat-e-salmā ke tāroñ kī sadā-e-dilkash

ābshāroñ kī nidā

ḳhārzāroñ kī sadā

phuul ke dil kī jalan sozish-e-mahtāb kā haal

Dūbte tāroñ ke ḳhāmosh nigāhoñ kā payām

nāla-e-nīm-shabī

āh-e-dil-e-zār kā haal

ālam-e-ishq-o-mohabbat kī hikāyāt sune

paas aa jaa.e to afsāna-e-shab-rañg sune

aur dekhe kisī shā.ir ke falak-bos mahal

kis tarah chāñd-sitāroñ ko janam dete haiñ

kis tarah āriz-e-gulgūñ ko ridā-e-shabnam

Dhāñp letī hai siyah-rāt ke sannāTe meñ

aariz-e-gul pe larazti hui bekal shabnam

muntazir hai ki chale baad-e-sahar

koi jhonka

koi suraj ki kiran

pas aa jae to afsana-e-shab-rang sune

naghma-e-zahra-o-nahid ki jhankar sune

barbat-e-salma ke taron ki sada-e-dilkash

aabshaaron ki nida

KHarzaron ki sada

phul ke dil ki jalan sozish-e-mahtab ka haal

Dubte taron ke KHamosh nigahon ka payam

nala-e-nim-shabi

aah-e-dil-e-zar ka haal

aalam-e-ishq-o-mohabbat ki hikayat sune

pas aa jae to afsana-e-shab-rang sune

aur dekhe kisi shair ke falak-bos mahal

kis tarah chand-sitaron ko janam dete hain

kis tarah aariz-e-gulgun ko rida-e-shabnam

Dhanp leti hai siyah-raat ke sannaTe mein