afsana-e-shahr

shahr ke shahr kā afsāna vo ḳhush-fahm magar saada musāfir

ki jinheñ ishq kī lalkār ke rahzan ne kahā: aao!

dikhlā.eñ tumheñ ek dar-e-basta ke asrār kā ḳhvāb

shahr ke shahr kā afsāna vo dil jin ke bayābāñ meñ

kisī qatra-e-gum-gashta ke nāgāh larazne kī sadā ne ye kahā:

''aao dikhlā.eñ tumheñ sub.h ke hoñToñ pe tabassum kā sarāb!''

shahr ke shahr kā afsāna vahī ārzū-e-ḳhasta ke lañgḌāte hue pair

ki haiñ aaj bhī afsāne kī duzdīda o zhūlīda lakīroñ pe ravāñ

un asīroñ kī tarah jin ke rag-o-reshe kī zanjīr kī jhankār

bhī tham jaa.e to kah uTTheñ kahāñ

''ab kahāñ jā.eñge ham

jaa.eñ ab taaza o nādīda nigāhoñ ke zamistāñ meñ kahāñ?''

un asīroñ kī tarah jin ke liye vaqt kī be-sarfa salāḳheñ

na kabhī sard na garm aur na kabhī saḳht na narm

na rihā.ī kī pazīrā.ī na asīrī hī kī sharm

shahr ke shahr kā afsāna vo rūheñ jo sar-e-pul ke sivā

aur kahīñ vasl kī juuyā hī nahīñ

pul se jinheñ paar utarne kī tamannā hī nahīñ

is kā yaarā hī nahīñ!

shahr ke shahr ka afsana wo KHush-fahm magar sada musafir

ki jinhen ishq ki lalkar ke rahzan ne kaha: aao!

dikhlaen tumhein ek dar-e-basta ke asrar ka KHwab

shahr ke shahr ka afsana wo dil jin ke bayaban mein

kisi qatra-e-gum-gashta ke nagah larazne ki sada ne ye kaha:

aao dikhlaen tumhein subh ke honTon pe tabassum ka sarab!

shahr ke shahr ka afsana wahi aarzu-e-KHasta ke langDate hue pair

ki hain aaj bhi afsane ki duzdida o zhulida lakiron pe rawan

un asiron ki tarah jin ke rag-o-reshe ki zanjir ki jhankar

bhi tham jae to kah uTThen kahan

ab kahan jaenge hum

jaen ab taza o nadida nigahon ke zamistan mein kahan?

un asiron ki tarah jin ke liye waqt ki be-sarfa salaKHen

na kabhi sard na garm aur na kabhi saKHt na narm

na rihai ki pazirai na asiri hi ki sharm

shahr ke shahr ka afsana wo ruhen jo sar-e-pul ke siwa

aur kahin wasl ki juya hi nahin

pul se jinhen par utarne ki tamanna hi nahin

is ka yara hi nahin!