agar KHuda mil gaya mujhko

ye sochtā huuñ jo

ḳhudā kabhī dīdār baḳhshegā

aur apne fazl se degā ijāzat māñgne kī kuchh

to na dastār-o-qabā na jibh-o-ḳhirqa

na daulat na mahal na sar pe taaj māñgūñgā

na ohda-o-mansab na koī jāh-o-jalāl

na ilm-o-āgahī na masnad na eqtidār māñgūñgā

farāvānī ġham se najāt na fāriġh-ul-bālī

na sehat na shifā na achchhī maut māñgūñgā

na takmīl-e-ārzū kī duā na nafs-e-mutma.inna kī

na umr-e-ḳhizr na shohrat na ḳhvāb kī ta.abīr māñgūñgā

na dushmanoñ ke zarar se na shar se dostoñ ke

na kibr-sinī na zo.af na lāchārī se panāh māñgūñgā

na duniyā jahān kī ḳhushiyāñ na shān-o-shaukat hī

na ḳhush-nasībī na dil kā chain na sukūn-e-rūh māñgūñgā

na ḳhush-gavār rāteñ na tūl-e-shabāb na niiñd na āġhosh-e-mahbūb

na sāmān-e-aish-o-tarab na hūr-o-qusūr māñgūñgā

na rusvā.ī se bachne kī na izzat aabrū kī ḳhvāhish hai

na shohrat-o-maqbūliyat na achchhī image māñgūñgā

na qarz ke bojh na ḳhauf na dahshat se

na kisī ke jabr se na zulm se hifāzat kī duā māñgūñgā

ab aap sochte hoñge

ki ye bāvlā ye dīvāna ye pāgal shaḳhs

na jaane āḳhir ḳhudā se kyā māñgegā

so mire hamdam mire dosto mire yaaro

zarā qarīb aao aao batā.ūñ raaz tumheñ dukhī dil kā

maiñ ḳhudā-e-qādir-e-mutlaq rahīm-o-akram se

junūn-e-mazhabī ke ḳhātme aur amn kī fazā māñgūñgā

ye sochta hun jo

KHuda kabhi didar baKHshega

aur apne fazl se dega ijazat mangne ki kuchh

to na dastar-o-qaba na jibh-o-KHirqa

na daulat na mahal na sar pe taj mangunga

na ohda-o-mansab na koi jah-o-jalal

na ilm-o-agahi na masnad na eqtidar mangunga

farawani gham se najat na farigh-ul-baali

na sehat na shifa na achchhi maut mangunga

na takmil-e-arzu ki dua na nafs-e-mutmainna ki

na umr-e-KHizr na shohrat na KHwab ki tabir mangunga

na dushmanon ke zarar se na shar se doston ke

na kibr-sini na zoaf na lachaari se panah mangunga

na duniya jahan ki KHushiyan na shan-o-shaukat hi

na KHush-nasibi na dil ka chain na sukun-e-ruh mangunga

na KHush-gawar raaten na tul-e-shabab na nind na aaghosh-e-mahbub

na saman-e-aish-o-tarab na hur-o-qusur mangunga

na ruswai se bachne ki na izzat aabru ki KHwahish hai

na shohrat-o-maqbuliyat na achchhi image mangunga

na qarz ke bojh na KHauf na dahshat se

na kisi ke jabr se na zulm se hifazat ki dua mangunga

ab aap sochte honge

ki ye bawla ye diwana ye pagal shaKHs

na jaane aaKHir KHuda se kya mangega

so mere hamdam mere dosto mere yaro

zara qarib aao aao bataun raaz tumhein dukhi dil ka

main KHuda-e-qadir-e-mutlaq rahim-o-akram se

junun-e-mazhabi ke KHatme aur amn ki faza mangunga