agar yahi hai shaeri to shaeri haram hai!

agar yahī hai shā.erī to shā.erī harām hai!

ḳhirad bhī zer-e-dām hai junūñ bhī zer-e-dām hai

havas kā naam ishq hai talab ḳhudī kā naam hai

nazar udaas dil malūl ruuh tishna-kām hai

magar laboñ pe naġhma-e-hayāt shād-kām hai

rahīn-e-āriz-e-hasīñ asīr-e-zulf-e-mushkbū!

nigāh meñ liye hue ghuTī ghuTī sī justujū

bhaTak rahe haiñ vādī-e-ḳhizāñ meñ bahr-e-rañg-o-bū

sahar ke giit gā rahe haiñ aur vaqt-e-shām hai

nazar meñ māh-o-kahkashāñ haiñ azmat-e-bashar nahīñ

qadam baḌhā rahe haiñ aur raah mo'tabar nahīñ

fareb-ḳhurda-e-chaman haiñ daam par nazar nahīñ

ḳhayāl-e-nazm-e-mai-kada nahīñ hai fikr-e-jām hai

milā vo iḳhtiyār jis pe bebasī hai ḳhanda-zan

vo raushnī milī ki jis pe tīrgī hai ḳhanda-zan

vo zindagī milī ki jis pe maut bhī hai ḳhanda-zan

ba-zid haiñ phir bhī kaj-nazar hayāt shād-kām hai

numā.ish-o-numūd-o-nañg-o-nām par nigāh hai!

jamāl-e-yār-o-jūebār-o-jām par nigāh hai

ba-nām-e-bandagī butān-e-bām par nigāh hai

shabāb-o-sher-o-shāhid-o-sharāb se hī kaam hai

agar yahī hai shā.erī to shā.erī harām hai

agar yahi hai shaeri to shaeri haram hai!

KHirad bhi zer-e-dam hai junun bhi zer-e-dam hai

hawas ka nam ishq hai talab KHudi ka nam hai

nazar udas dil malul ruh tishna-kaam hai

magar labon pe naghma-e-hayat shad-kaam hai

rahin-e-ariz-e-hasin asir-e-zulf-e-mushkbu!

nigah mein liye hue ghuTi ghuTi si justuju

bhaTak rahe hain wadi-e-KHizan mein bahr-e-rang-o-bu

sahar ke git ga rahe hain aur waqt-e-sham hai

nazar mein mah-o-kahkashan hain azmat-e-bashar nahin

qadam baDha rahe hain aur rah mo'tabar nahin

fareb-KHurda-e-chaman hain dam par nazar nahin

KHayal-e-nazm-e-mai-kada nahin hai fikr-e-jam hai

mila wo iKHtiyar jis pe bebasi hai KHanda-zan

wo raushni mili ki jis pe tirgi hai KHanda-zan

wo zindagi mili ki jis pe maut bhi hai KHanda-zan

ba-zid hain phir bhi kaj-nazar hayat shad-kaam hai

numaish-o-numud-o-nang-o-nam par nigah hai!

jamal-e-yar-o-juebar-o-jam par nigah hai

ba-nam-e-bandagi butan-e-baam par nigah hai

shabab-o-sher-o-shahid-o-sharab se hi kaam hai

agar yahi hai shaeri to shaeri haram hai