ahd-e-saza

ye ek ahd-e-sazā hai jazā kī baat na kar

duā se haath uThā rakh davā kī baat na kar

ḳhudā ke naam pe zālim nahīñ ye zulm ravā

mujhe jo chāhe sazā de ḳhudā kī baat na kar

hayāt ab to inhīñ mahbasoñ meñ guzregī

sitamgaroñ se koī iltijā kī baat na kar

unhī ke haath meñ patthar haiñ jin ko pyaar kiyā

ye dekh hashr hamārā vafā kī baat na kar

abhī to paa.ī hai maiñ ne rihā.ī rahzan se

bhaTak na jā.ūñ maiñ phir rahnumā kī baat na kar

bujhā diyā hai havā ne har ek dayā kā diyā

na DhūñD ahl-e-karam ko dayā kī baat na kar

nuzūl-e-habs huā hai falak se ai 'jālib'

ghuTā ghuTā hī sahī dam ghaTā kī baat na kar

ye ek ahd-e-saza hai jaza ki baat na kar

dua se hath uTha rakh dawa ki baat na kar

KHuda ke nam pe zalim nahin ye zulm rawa

mujhe jo chahe saza de KHuda ki baat na kar

hayat ab to inhin mahbason mein guzregi

sitamgaron se koi iltija ki baat na kar

unhi ke hath mein patthar hain jin ko pyar kiya

ye dekh hashr hamara wafa ki baat na kar

abhi to pai hai main ne rihai rahzan se

bhaTak na jaun main phir rahnuma ki baat na kar

bujha diya hai hawa ne har ek daya ka diya

na DhunD ahl-e-karam ko daya ki baat na kar

nuzul-e-habs hua hai falak se ai 'jalib'

ghuTa ghuTa hi sahi dam ghaTa ki baat na kar