ahinsa ki pahli sunahri kiran

ḳhirāmāñ ḳhirāmāñ chalī aa rahī hai

nigāhoñ pe ik husn se chhā rahī hai

har ik gaam par nuur bikhrā rahī hai

ufuq par vo parcham ko lahrā rahī hai

ahinsā kī pahlī sunahrī kiran

milī kīmiyā-gar ko āḳhir vo buuTī

ki jis se alā.eq kī zanjīr TuuTī

shab-e-tār meñ jaise mahtāb chhūTī

tajallī ke parde se phūTī vo phūTī

ahinsā kī pahlī sunahrī kiran

nayā ruup hastī ne paidā kiyā hai

har ik dil meñ ik valvala bhar rahā hai

musībat kā ehsās himmat-fazā hai

ki arbāb-e-bīnish kī ab rahnumā hai

ahinsā kī pahlī sunahrī kiran

zamīn-o-zamāñ ham-navā ho rahe haiñ

ki dil vaale tuḳhm-e-vafā bo rahe haiñ

vahī pā rahe haiñ jo kuchh kho rahe haiñ

jagā.egī un ko bhī jo so rahe haiñ

ahinsā kī pahlī sunahrī kiran

KHiraman KHiraman chali aa rahi hai

nigahon pe ek husn se chha rahi hai

har ek gam par nur bikhra rahi hai

ufuq par wo parcham ko lahra rahi hai

ahinsa ki pahli sunahri kiran

mili kimiya-gar ko aaKHir wo buTi

ki jis se alaeq ki zanjir TuTi

shab-e-tar mein jaise mahtab chhuTi

tajalli ke parde se phuTi wo phuTi

ahinsa ki pahli sunahri kiran

naya rup hasti ne paida kiya hai

har ek dil mein ek walwala bhar raha hai

musibat ka ehsas himmat-faza hai

ki arbab-e-binish ki ab rahnuma hai

ahinsa ki pahli sunahri kiran

zamin-o-zaman ham-nawa ho rahe hain

ki dil wale tuKHm-e-wafa bo rahe hain

wahi pa rahe hain jo kuchh kho rahe hain

jagaegi un ko bhi jo so rahe hain

ahinsa ki pahli sunahri kiran