ahsan taqwim

bustān-e-vafā dahr meñ ābād hai ham se

din-rāt zamāne ko ḳhudā yaad hai ham se

tārīḳh-e-junūñ ḳhuun se kī ham ne nigārish

āfāq haiñ har masnad-e-irshād hai ham se

raushan kiyā zulmāt meñ qindīl-e-hunar ko

sahrā meñ chaman nuur kā ābād hai ham se

ham jannat-e-parvez ke haiñ husn-e-tafāḳhur

shīrīñ kī talab taisha-e-farhād hai ham se

sāñche meñ ġham-o-dard ke insān ko Dhālā

shahkār-e-jahāñ-sāz bhī ījād hai ham se

ḳhvābīda shabistāñ meñ azaañ ham ne pukārī

īmān-sarā dahr kā ābād hai ham se

ham shahr-e-tafalsuf meñ haiñ tadrīs kī tanvīr

shamshīr ba-kaf bāzū-e-faulād hai ham se

ta.amīr kiyā teshā-e-fan se chaman-e-dahr

tanqīd-e-haq-āsār bhī ījād hai ham se

me.amār-e-yaqīñ-sāz haiñ darvesh ke ādāb

baaqī abhī ta.alīm-e-ḳhudā-dād hai ham se

iḳhlās ke motī se bharā dāman-e-aġhyār

iqlīm-e-jahāñ meñ adl-o-rād hai ham se

aivān-e-zar-o-sīm meñ mahshar huā barpā

ḳhā.if hama-tan lashkar-e-shaddād hai ham se

māhaul-e-zamāna hai alamnāk-o-jigar-doz

qaa.em vale kuchh rahmat-e-javvād hai ham se

sar-bāzī-e-paiham se hai gulzār murattab

sar-chashma-e-anvār kī buniyād hai ham se

ham ahsan-e-taqvīm ke haiñ boltī tafsīr

rañgīn-e-dil-e-getī kī rūdād hai ham se

baḳhshī hai ġhulāmoñ ko bhī ahrār kī jur.at

duniyā kā giraftār bhī āzād hai ham se

ham miT ga.e duniyā se to duniyā nahīñ hogī

har zarra hai raushan to jahāñ shaad hai ham se

ilhād kī zulmat se zamāne ko nikālā

aslāf kī mahfil abhī ābād hai ham se

sar-mastī-e-kirdār se raḳhshanda hai āfāq

mahfūz abhī maḳhzan-e-ajdād hai ham se

tahzīb-o-tamaddun kā sabaq ham ne paḌhāyā

har husn-e-jahāñ-sāz kī ījād hai ham se

'bebāk' kahāñ gosh-bar-āvāz zamāna

kuchh millat-e-ma.asūm kī fariyād hai ham se

bustan-e-wafa dahr mein aabaad hai hum se

din-raat zamane ko KHuda yaad hai hum se

tariKH-e-junun KHun se ki hum ne nigarish

aafaq hain har masnad-e-irshad hai hum se

raushan kiya zulmat mein qindil-e-hunar ko

sahra mein chaman nur ka aabaad hai hum se

hum jannat-e-parwez ke hain husn-e-tafaKHur

shirin ki talab taisha-e-farhad hai hum se

sanche mein gham-o-dard ke insan ko Dhaala

shahkar-e-jahan-saz bhi ijad hai hum se

KHwabida shabistan mein azan hum ne pukari

iman-sara dahr ka aabaad hai hum se

hum shahr-e-tafalsuf mein hain tadris ki tanwir

shamshir ba-kaf bazu-e-faulad hai hum se

tamir kiya tesha-e-fan se chaman-e-dahr

tanqid-e-haq-asar bhi ijad hai hum se

meamar-e-yaqin-saz hain darwesh ke aadab

baqi abhi talim-e-KHuda-dad hai hum se

iKHlas ke moti se bhara daman-e-aghyar

iqlim-e-jahan mein adl-o-rad hai hum se

aiwan-e-zar-o-sim mein mahshar hua barpa

KHaif hama-tan lashkar-e-shaddad hai hum se

mahaul-e-zamana hai alamnak-o-jigar-doz

qaem wale kuchh rahmat-e-jawwad hai hum se

sar-bazi-e-paiham se hai gulzar murattab

sar-chashma-e-anwar ki buniyaad hai hum se

hum ahsan-e-taqwim ke hain bolti tafsir

rangin-e-dil-e-geti ki rudad hai hum se

baKHshi hai ghulamon ko bhi ahrar ki jurat

duniya ka giraftar bhi aazad hai hum se

hum miT gae duniya se to duniya nahin hogi

har zarra hai raushan to jahan shad hai hum se

ilhad ki zulmat se zamane ko nikala

aslaf ki mahfil abhi aabaad hai hum se

sar-masti-e-kirdar se raKHshanda hai aafaq

mahfuz abhi maKHzan-e-ajdad hai hum se

tahzib-o-tamaddun ka sabaq hum ne paDhaya

har husn-e-jahan-saz ki ijad hai hum se

'bebak' kahan gosh-bar-awaz zamana

kuchh millat-e-masum ki fariyaad hai hum se