ai baad-e-saba chal

yuuñ aa.e haiñ ghir ghir ke ye dukh-dard ke bādal

tārīk fazāoñ meñ ghulā jaise ho kājal

bechain haiñ be-tāb haiñ be-ās haiñ bekal

lahrā de zarā aa ke tū ummīd kā āñchal

ai bād-e-sabā bād-e-sabā bād-e-sabā chal

gulshan meñ na vo rañg na vo ruup rahā hai

ġhunche kī na ab aañkh meñ vo kaif bharā hai

kab phuul ke siine meñ dhaḌakne kī sadā hai

sannāTā sā sannāTā hai harakat hai na halchal

ai bād-e-sabā bād-e-sabā bād-e-sabā chal

kāñToñ se hai sad-chāk har ik gul kā garebāñ

har samt se hai bijliyoñ kī zad meñ gulistāñ

soyā hai abhī taan ke chaukhaT pe nigahbāñ

Dastī hai savere ko siyah-rāt har ik pal

ai bād-e-sabā bād-e-sabā bād-e-sabā chal

tū aa.e to gulshan kā hasīñ chehra nikhar jaa.e

har ġhuncha mahak jaa.e har ek pattā sañvar jaa.e

kumhlā.e se phūloñ kā bhī kuchh haal sudhar jaa.e

baaqī rahe qismat meñ koī ḳham na koī bal

ai bād-e-sabā bād-e-sabā bād-e-sabā chal

tū aa.e to phir kaif-o-masarrat kī fazā aa.e

is ḳhaak meñ jiine kā aur marne kā maza aa.e

sīnoñ meñ umañg uTThe to phir josh nayā aa.e

aur raat ke chehre pe Dhalak jaa.e phir āñchal

ai bād-e-sabā bād-e-sabā bād-e-sabā chal

aa jā ki zarā shaġhl-e-mai-o-jām kareñge

kuchh tazkira-e-yār-e-dil-ārām kareñge

rañgīn har ik sub.h har ik shaam kareñge

aur naġhme suneñge hasīñ-o-shoḳh aur chanchal

ai bād-e-sabā bād-e-sabā bād-e-sabā chal

ai bād-e-sabā chal

yun aae hain ghir ghir ke ye dukh-dard ke baadal

tarik fazaon mein ghula jaise ho kajal

bechain hain be-tab hain be-as hain bekal

lahra de zara aa ke tu ummid ka aanchal

ai baad-e-saba baad-e-saba baad-e-saba chal

gulshan mein na wo rang na wo rup raha hai

ghunche ki na ab aankh mein wo kaif bhara hai

kab phul ke sine mein dhaDakne ki sada hai

sannaTa sa sannaTa hai harakat hai na halchal

ai baad-e-saba baad-e-saba baad-e-saba chal

kanTon se hai sad-chaak har ek gul ka gareban

har samt se hai bijliyon ki zad mein gulistan

soya hai abhi tan ke chaukhaT pe nigahban

Dasti hai sawere ko siyah-raat har ek pal

ai baad-e-saba baad-e-saba baad-e-saba chal

tu aae to gulshan ka hasin chehra nikhar jae

har ghuncha mahak jae har ek patta sanwar jae

kumhlae se phulon ka bhi kuchh haal sudhar jae

baqi rahe qismat mein koi KHam na koi bal

ai baad-e-saba baad-e-saba baad-e-saba chal

tu aae to phir kaif-o-masarrat ki faza aae

is KHak mein jine ka aur marne ka maza aae

sinon mein umang uTThe to phir josh naya aae

aur raat ke chehre pe Dhalak jae phir aanchal

ai baad-e-saba baad-e-saba baad-e-saba chal

aa ja ki zara shaghl-e-mai-o-jam karenge

kuchh tazkira-e-yar-e-dil-aram karenge

rangin har ek subh har ek sham karenge

aur naghme sunenge hasin-o-shoKH aur chanchal

ai baad-e-saba baad-e-saba baad-e-saba chal

ai baad-e-saba chal