ai dil-e-afsurda

ai dil-e-afsurda piine kī bahāreñ aa ga.iiñ

kaalī kaalī badliyāñ phir āsmāñ par chhā ga.iiñ

dāman-e-kohsār se ThanDī havā aane lagī

nabz-e-ḳhas meñ zindagī kā ḳhuun dauḌāne lagī

motiye ke phuul gulzāroñ meñ lahrāne lage

lāla-o-nasrīñ ke jalve rang par aane lage

hai kanār-e-āb-e-dariyā māh-pāroñ kā hujūm

jis tarah shādāb rātoñ meñ sitāroñ kā hujūm

kaale kaale āñchaloñ meñ un ke chehre nūr-pāsh

gahre gahre bādaloñ meñ bijliyoñ kā irti.āsh

gul-badan gul-pairahan mahtāb-ruḳh nāz-āfrīñ

dilrubā.ī kī adākārī meñ e.ajāz-āfrīñ

kuchh lagāvaT kuchh hayā kuchh shoḳhiyāñ kuchh iztirāb

apne saa.e se gurezāñ apne saa.e se hijāb

dilbarī ke sab tarīqe sādgī ke rang haiñ

sādgī ke sab tarīqe dilbarī ke rang haiñ

ai dil-e-afsurda ai kam-baḳht ai hasrat-nasīb

ai fareb-e-husn ke pāmāl ai furqat-nasīb

tū hai aur us be-vafā kī bevafā.ī ke gile

bevafā.ī ke gile dard-e-judā.ī ke gile

har taraf ik ālam-e-kaif-o-tarab chhāyā huā

aur tū ai bad-nasīb-e-shauq murjhāyā huā

kaise kaise mah-jabīñ haiñ nūr-paikar barq-tāb

dil-navāzī ke liye betāb hai jin kā shabāb

in hasīnoñ ke ishārāt-e-mohabbat dil-faroz

jin ke jalve dilrubā haiñ jin kī tal.at dil-faroz

dilbarī ke kaise kaise nukta-dāñ maujūd haiñ

sajda karnā ho to kitne āstāñ maujūd haiñ

ai dil-e-afsurda pine ki bahaaren aa gain

kali kali badliyan phir aasman par chha gain

daman-e-kohsar se ThanDi hawa aane lagi

nabz-e-KHas mein zindagi ka KHun dauDane lagi

motiye ke phul gulzaron mein lahrane lage

lala-o-nasrin ke jalwe rang par aane lage

hai kanar-e-ab-e-dariya mah-paron ka hujum

jis tarah shadab raaton mein sitaron ka hujum

kale kale aanchalon mein un ke chehre nur-pash

gahre gahre baadalon mein bijliyon ka irtiash

gul-badan gul-pairahan mahtab-ruKH naz-afrin

dilrubai ki adakari mein eajaz-afrin

kuchh lagawaT kuchh haya kuchh shoKHiyan kuchh iztirab

apne sae se gurezan apne sae se hijab

dilbari ke sab tariqe sadgi ke rang hain

sadgi ke sab tariqe dilbari ke rang hain

ai dil-e-afsurda ai kam-baKHt ai hasrat-nasib

ai fareb-e-husn ke pamal ai furqat-nasib

tu hai aur us be-wafa ki bewafai ke gile

bewafai ke gile dard-e-judai ke gile

har taraf ek aalam-e-kaif-o-tarab chhaya hua

aur tu ai bad-nasib-e-shauq murjhaya hua

kaise kaise mah-jabin hain nur-paikar barq-tab

dil-nawazi ke liye betab hai jin ka shabab

in hasinon ke ishaaraat-e-mohabbat dil-faroz

jin ke jalwe dilruba hain jin ki talat dil-faroz

dilbari ke kaise kaise nukta-dan maujud hain

sajda karna ho to kitne aastan maujud hain