ai gham-e-dil kya karun

itnī guzrī hai girāñ chīzoñ kī arzānī mujhe

ho gayā hai taaza saudā-e-ġhazal-ḳhvānī mujhe

duudh meñ bilkul nazar aatā nahīñ paanī mujhe

dil ne kar rakkhā hai mahv-e-sad-pareshānī mujhe

''ai ġham-e-dil kyā karūñ ai vahshat-e-dil kyā karūñ''

kaam dhandā kuchh nahīñ dil kis tarah bahlāūñ maiñ

kyuuñ na leader ban ke saarī qaum ko bahkā.ūñ maiñ

jab nahīñ dhandā to chandā hī karūñ aur khā.ūñ maiñ

scrēning kī kametī ke na haath aa jā.ūñ maiñ

''ai ġham-e-dil kyā karūñ ai vahshat-e-dil kyā karūñ''

kyuuñ na editor banūñ aḳhbār-e-gauhar-bār kā

aur qalam ko ruup duuñ chaltī huī talvār kā

haath meñ shamla ho sab ashrāf kī dastār kā

marshal-law meñ magar pahlā hai TukḌā maar kā

''ai ġham-e-dil kyā karūñ ai vahshat-e-dil kyā karūñ''

sochtā huuñ phir ki haj kar aa.uuñ smuggler banūñ

māl-e-dīn o māl-e-duniyā kā baḌā dealer banūñ

mulk ke andar banūñ yā mulk ke bāhar banūñ

al-ġharaz jo kuchh banūñ maiñ fauj se bach kar banūñ

''ai ġham-e-dil kyā karūñ ai vahshat-e-dil kyā karūñ''

kyā ḳhabar thī qīmateñ yuuñ hoñgī sastī ek din

''rañg lā.egī hamārī fāqa-mastī ek din''

chor-bāzārī kī miT jā.egī hastī ek din

hogī chevrolet pe bhī to-let kī taḳhtī ek din

''ai ġham-e-dil kyā karūñ ai vahshat-e-dil kyā karūñ''

bahr ke siine se sonā tak ugalvāyā gayā

gandum-e-ḳhalvat-nashīñ bāzār meñ laayā gayā

aur zaḳhīra-bāz se chakkī meñ pisvāyā gayā

naf.a-ḳhoroñ kā divāla tak nikalvāyā gayā

''ai ġham-e-dil kyā karūñ ai vahshat-e-dil kyā karūñ''

haa.e kashkol-e-gadā.ī le ke ab jā.egā kaun

laal gandum lā ke ham kāloñ ko khilvā.egā kaun

jis ko amrīcī suar khāte the vo khā.egā kaun

saath meñ gandum ke mister ghun ko pisvā.egā kaun

''ai ġham-e-dil kyā karūñ ai vahshat-e-dil kyā karūñ''

ġhair-mulkī maal ko rotī haiñ ab tak bībayāñ

aur har import ke licence ko un ke miyāñ

ġhair bankoñ meñ jo daulat hai vo aa.egī yahāñ

''yād thiiñ ham ko bhī rañgā-rañg bazm-ārā.iyāñ''

''ai ġham-e-dil kyā karūñ ai vahshat-e-dil kyā karūñ''

yā maiñ sab kuchh chhoḌ duuñ aur chor-bāzārī karūñ

zindagī kī film meñ aisī adākārī karūñ

donoñ hāthoñ se kamā kar uzr-e-nādārī karūñ

jab hukūmat tex māñge aah aur zaarī karūñ

''ai ġham-e-dil kyā karūñ ai vahshat-e-dil kyā karūñ''

itni guzri hai giran chizon ki arzani mujhe

ho gaya hai taza sauda-e-ghazal-KHwani mujhe

dudh mein bilkul nazar aata nahin pani mujhe

dil ne kar rakkha hai mahw-e-sad-pareshani mujhe

ai gham-e-dil kya karun ai wahshat-e-dil kya karun

kaam dhanda kuchh nahin dil kis tarah bahlaun main

kyun na leader ban ke sari qaum ko bahkaun main

jab nahin dhanda to chanda hi karun aur khaun main

screening ki kameti ke na hath aa jaun main

ai gham-e-dil kya karun ai wahshat-e-dil kya karun

kyun na editor banun aKHbar-e-gauhar-bar ka

aur qalam ko rup dun chalti hui talwar ka

hath mein shamla ho sab ashraf ki dastar ka

marshal-law mein magar pahla hai TukDa mar ka

ai gham-e-dil kya karun ai wahshat-e-dil kya karun

sochta hun phir ki haj kar aaun smuggler banun

mal-e-din o mal-e-duniya ka baDa dealer banun

mulk ke andar banun ya mulk ke bahar banun

al-gharaz jo kuchh banun main fauj se bach kar banun

ai gham-e-dil kya karun ai wahshat-e-dil kya karun

kya KHabar thi qimaten yun hongi sasti ek din

rang laegi hamari faqa-masti ek din

chor-bazari ki miT jaegi hasti ek din

hogi chewrolet pe bhi to-let ki taKHti ek din

ai gham-e-dil kya karun ai wahshat-e-dil kya karun

bahr ke sine se sona tak ugalwaya gaya

gandum-e-KHalwat-nashin bazar mein laya gaya

aur zaKHira-baz se chakki mein piswaya gaya

nafa-KHoron ka diwala tak nikalwaya gaya

ai gham-e-dil kya karun ai wahshat-e-dil kya karun

hae kashkol-e-gadai le ke ab jaega kaun

lal gandum la ke hum kalon ko khilwaega kaun

jis ko amrici suar khate the wo khaega kaun

sath mein gandum ke mister ghun ko piswaega kaun

ai gham-e-dil kya karun ai wahshat-e-dil kya karun

ghair-mulki mal ko roti hain ab tak bibayan

aur har import ke licence ko un ke miyan

ghair bankon mein jo daulat hai wo aaegi yahan

yaad thin hum ko bhi ranga-rang bazm-araiyan

ai gham-e-dil kya karun ai wahshat-e-dil kya karun

ya main sab kuchh chhoD dun aur chor-bazari karun

zindagi ki film mein aisi adakari karun

donon hathon se kama kar uzr-e-nadari karun

jab hukumat tex mange aah aur zari karun

ai gham-e-dil kya karun ai wahshat-e-dil kya karun