ai hijr-zada shab

ai hijr-zada shab

aa tū hī mire siine se lag jā ki bate ġham

ehsās ko tanhā.ī kī manzil se mile rah

āvāz kī gumnām zamīnoñ ko mile nam

aa kuchh to ghaTe ġham

is sā.at-e-mahjūr kī fariyād ho maddham

kyuuñ nauha-ba-lb phirtī hai mahrūm-e-muḳhātab

ai hijr-zada shab

dekh aaj tamannāoñ kī be-samt havā.eñ

dil-e-sharminda-nazar ko

phir le ke chalī haiñ vahī be-raḳht havā.eñ

usī jaadū ke nagar ko

jis ḳhaak pe utre the murādoñ ke sahīfe

sankī thī jahāñ sabz havā, kū-e-vafā kī

mahke the jahāñ phūl-sifat rañg kisī ke

us ḳhaak kā har ruup mire vāste zindān

kuchh rūThe hue ḳhvāb haiñ kuchh TuuTe hue maan

kuchh barse hue abr haiñ kuchh tarse hue lab

ai hijr-zada shab

aa tū hī gale lag ke batā kaun yahāñ hai

juz ḳhud-sarī-e-mauj-e-havā kaun yahāñ hai

hamdard mirā tere sivā kaun yahāñ hai

aa chuum luuñ āñkheñ tirī ruḳhsār tire lab

ai hijr-zada shab

ai hijr-zada shab

aa tu hi mere sine se lag ja ki bate gham

ehsas ko tanhai ki manzil se mile rah

aawaz ki gumnam zaminon ko mile nam

aa kuchh to ghaTe gham

is saat-e-mahjur ki fariyaad ho maddham

kyun nauha-ba-lb phirti hai mahrum-e-muKHatab

ai hijr-zada shab

dekh aaj tamannaon ki be-samt hawaen

dil-e-sharminda-nazar ko

phir le ke chali hain wahi be-raKHt hawaen

usi jadu ke nagar ko

jis KHak pe utre the muradon ke sahife

sanki thi jahan sabz hawa, ku-e-wafa ki

mahke the jahan phul-sifat rang kisi ke

us KHak ka har rup mere waste zindan

kuchh ruThe hue KHwab hain kuchh TuTe hue man

kuchh barse hue abr hain kuchh tarse hue lab

ai hijr-zada shab

aa tu hi gale lag ke bata kaun yahan hai

juz KHud-sari-e-mauj-e-hawa kaun yahan hai

hamdard mera tere siwa kaun yahan hai

aa chum lun aankhen teri ruKHsar tere lab

ai hijr-zada shab