ai mere watan ke KHush-nawao

ik umr ke ba.ad tum mile ho

ai mere vatan ke ḳhush-navāo

har hijr kā din thā hashr kā din

dozaḳh the firāq ke alaao

ro.uuñ ki hañsūñ samajh na aa.e

hāthoñ meñ haiñ phuul dil meñ ghaao

tum aa.e to saath hī tumhāre

bichhḌe hue yaar yaad aa.e

ik zaḳhm pe tum ne haath rakkhā

aur mujh ko hazār yaad aa.e

vo saare rafīq pā-ba-jaulāñ

sab kushta-e-dār yaad aa.e

ham sab kā hai ek hī qabīla

ik dasht ke saare ham-safar haiñ

kuchh vo haiñ jo dūsroñ kī ḳhātir

āshufta-nasīb o dar-ba-dar haiñ

kuchh vo haiñ jo ḳhil.at-o-qabā se

aivān-e-shahī meñ mo'tabar haiñ

suqrāt o masīh ke fasāne

tum bhī to bahut sunā rahe the

mansūr o husain se aqīdat

tum bhī to bahut jatā rahe the

kahte the sadāqateñ amar haiñ

auroñ ko yahī batā rahe the

aur ab jo haiñ jā-ba-jā salībeñ

tum bāñsuriyāñ bajā rahe ho

aur ab jo hai karbalā kā naqsha

tum mad.h-e-yazīd gā rahe ho

jab sach tah-e-teġh ho rahā hai

tum sach se nazar churā rahe ho

jī chāhtā hai ki tum se pūchhūñ

kyā raaz is ijtināb meñ hai

tum itne kaThor to nahīñ the

ye be-hisī kisī hisāb meñ hai

tum chup ho to kis tarah se chup ho

jab ḳhalq-e-ḳhudā azaab meñ hai

socho to tumheñ milā bhī kyā hai

ik luqma-e-tar qalam kī qīmat

ġhairat ko faroḳht karne vaalo

ik kāsa-e-zar qalam kī qīmat

pindār ke tājiro batāo

darbān kā dar qalam kī qīmat

nādāñ to nahīñ ho tum ki samjhūñ

ġhaflat se ye zahr gholte ho

thāme hue maslahat kī mīzān

har sher kā vazn taulte ho

aise meñ sukūt, chashm-poshī

aisā hai ki jhuuT bolte ho

ik umr se adl o sidq kī laash

ġhāsib kī salīb par jaḌī hai

is vaqt bhī tum ġhazal-sarā ho

jab zulm kī har ghaḌī kaḌī hai

jañgal pe lapak rahe haiñ shole

tā.ūs ko raqs kī paḌī hai

hai sab ko aziiz kū-e-jānāñ

is raah meñ sab jiye mare haiñ

haañ merī bayāz-e-sher meñ bhī

barbādi-e-dil ke marsiye haiñ

maiñ ne bhī kiyā hai TuuT kar ishq

aur ek nahīñ ka.ī kiye haiñ

lekin ġham-e-āshiqī nahīñ hai

aisā jo subuk-sarī sikhā.e

ye ġham to vo ḳhush-ma.āl ġham hai

jo koh se jū-e-shīr laa.e

teshe kā hunar qalam ko baḳhshe

jo qais ko kohkan banā.e

ai hīla-garān-e-shahr-e-shīrīñ

aayā huuñ pahāḌ kaaT kar maiñ

hai be-vatanī gavāh merī

har-chand phirā huuñ dar-ba-dar maiñ

bechā na ġhurūr-e-nai-navāzī

aisā bhī na thā subuk hunar meñ

tum bhī kabhī ham-navā the mere

phir aaj tumheñ ye kyā huā hai

miTTī ke vaqār ko na becho

ye ahd-e-sitam jihād kā hai

daryūza-garī ke maqbaroñ se

zindāñ kī fasīl ḳhushnumā hai

kab ek hī rut rahī hamesha

ye zulm kī fasl bhī kaTegī

jab harf kahegā qum-be-iznī

martī huī ḳhaak jī uThegī

lailā-e-vatan ke pairahan meñ

bārūd kī bū nahīñ rahegī

phir bāñdheñge abruoñ ke dohe

phir mad.h-e-ruḳh-o-dahan kaheñge

Thahrā.eñge un laboñ ko matlā

jānāñ ke liye suḳhan kaheñge

afsāna-e-yār o qissa-e-dil

phir anjuman anjuman kaheñge

ek umr ke baad tum mile ho

ai mere watan ke KHush-nawao

har hijr ka din tha hashr ka din

dozaKH the firaq ke alao

roun ki hansun samajh na aae

hathon mein hain phul dil mein ghao

tum aae to sath hi tumhaare

bichhDe hue yar yaad aae

ek zaKHm pe tum ne hath rakkha

aur mujh ko hazar yaad aae

wo sare rafiq pa-ba-jaulan

sab kushta-e-dar yaad aae

hum sab ka hai ek hi qabila

ek dasht ke sare ham-safar hain

kuchh wo hain jo dusron ki KHatir

aashufta-nasib o dar-ba-dar hain

kuchh wo hain jo KHilat-o-qaba se

aiwan-e-shahi mein mo'tabar hain

suqraat o masih ke fasane

tum bhi to bahut suna rahe the

mansur o husain se aqidat

tum bhi to bahut jata rahe the

kahte the sadaqaten amar hain

auron ko yahi bata rahe the

aur ab jo hain ja-ba-ja saliben

tum bansuriyan baja rahe ho

aur ab jo hai karbala ka naqsha

tum madh-e-yazid ga rahe ho

jab sach tah-e-tegh ho raha hai

tum sach se nazar chura rahe ho

ji chahta hai ki tum se puchhun

kya raaz is ijtinab mein hai

tum itne kaThor to nahin the

ye be-hisi kisi hisab mein hai

tum chup ho to kis tarah se chup ho

jab KHalq-e-KHuda azab mein hai

socho to tumhein mila bhi kya hai

ek luqma-e-tar qalam ki qimat

ghairat ko faroKHt karne walo

ek kasa-e-zar qalam ki qimat

pindar ke tajiro batao

darban ka dar qalam ki qimat

nadan to nahin ho tum ki samjhun

ghaflat se ye zahr gholte ho

thame hue maslahat ki mizan

har sher ka wazn taulte ho

aise mein sukut, chashm-poshi

aisa hai ki jhuT bolte ho

ek umr se adl o sidq ki lash

ghasib ki salib par jaDi hai

is waqt bhi tum ghazal-sara ho

jab zulm ki har ghaDi kaDi hai

jangal pe lapak rahe hain shole

taus ko raqs ki paDi hai

hai sab ko aziz ku-e-jaanan

is rah mein sab jiye mare hain

han meri bayaz-e-sher mein bhi

barbaadi-e-dil ke marsiye hain

main ne bhi kiya hai TuT kar ishq

aur ek nahin kai kiye hain

lekin gham-e-ashiqi nahin hai

aisa jo subuk-sari sikhae

ye gham to wo KHush-maal gham hai

jo koh se ju-e-shir lae

teshe ka hunar qalam ko baKHshe

jo qais ko kohkan banae

ai hila-garan-e-shahr-e-shirin

aaya hun pahaD kaT kar main

hai be-watani gawah meri

har-chand phira hun dar-ba-dar main

becha na ghurur-e-nai-nawazi

aisa bhi na tha subuk hunar mein

tum bhi kabhi ham-nawa the mere

phir aaj tumhein ye kya hua hai

miTTi ke waqar ko na becho

ye ahd-e-sitam jihad ka hai

daryuza-gari ke maqbaron se

zindan ki fasil KHushnuma hai

kab ek hi rut rahi hamesha

ye zulm ki fasl bhi kaTegi

jab harf kahega qum-be-izni

marti hui KHak ji uThegi

laila-e-watan ke pairahan mein

barud ki bu nahin rahegi

phir bandhenge abruon ke dohe

phir madh-e-ruKH-o-dahan kahenge

Thahraenge un labon ko matla

jaanan ke liye suKHan kahenge

afsana-e-yar o qissa-e-dil

phir anjuman anjuman kahenge