ai mere be-dard shahr

dil sulag uThtā hai apne bām-o-dar ko dekh kar

phailne lagtī haiñ jab bhī shaam kī parchhā.iyāñ

is qadar vīrān lamhe is qadar sunsān raat

soch meñ gum haiñ ufuq se tā-ufuq pahnā.iyāñ

kis liye raushan karūñ dīvār-o-dar koī to ho

gung dīvāroñ meñ kyā hoñ anjuman-ārā.iyāñ

duur har shab jaag uThte haiñ ka.ī māh-o-nujūm

aag bhaḌkātī haiñ sang-o-ḳhisht kī rā'nā.iyāñ

rāstoñ se ḳhvāb-gāhoñ tak musalsal mauj-e-rang

jis tarah qaus-e-quzah kī TūTtī añgḌā.iyāñ

zaḳhm-e-nazzāra liye āñkhoñ meñ chup taktā rahā

go mirī nīñdeñ bhī mujh se le uḌiiñ shahnā.iyāñ

kal zarā sī der chamke the mire dīvār-o-dar

jhilmilā uTThī thiiñ merī ruuh kī gahrā.iyāñ

chand lamhoñ ke liye lau de uThā thā ik charāġh

aur damak uTThī thiiñ kuchh lamhe mirī tanhā.iyāñ

aaj itnā shor kyoñ hai ai mire bedard shahr

har nazar merī taraf hai is qadar rusvā.iyāñ

dil sulag uThta hai apne baam-o-dar ko dekh kar

phailne lagti hain jab bhi sham ki parchhaiyan

is qadar viran lamhe is qadar sunsan raat

soch mein gum hain ufuq se ta-ufuq pahnaiyan

kis liye raushan karun diwar-o-dar koi to ho

gung diwaron mein kya hon anjuman-araiyan

dur har shab jag uThte hain kai mah-o-nujum

aag bhaDkati hain sang-o-KHisht ki ra'naiyan

raston se KHwab-gahon tak musalsal mauj-e-rang

jis tarah qaus-e-quzah ki TuTti angDaiyan

zaKHm-e-nazzara liye aankhon mein chup takta raha

go meri ninden bhi mujh se le uDin shahnaiyan

kal zara si der chamke the mere diwar-o-dar

jhilmila uTThi thin meri ruh ki gahraiyan

chand lamhon ke liye lau de uTha tha ek charagh

aur damak uTThi thin kuchh lamhe meri tanhaiyan

aaj itna shor kyon hai ai mere bedard shahr

har nazar meri taraf hai is qadar ruswaiyan