ai nae sal bata tujh mein naya-pan kya hai

ai na.e saal batā tujh meñ nayā-pan kyā hai

har taraf ḳhalq ne kyoñ shor machā rakhā hai

raushnī din kī vahī tāroñ bharī raat vahī

aaj ham ko nazar aatī hai har ek baat vahī

āsmān badlā hai afsos nā badlī hai zamīñ

ek hindise kā badalnā koī jiddat to nahīñ

agle barsoñ kī tarah hoñge qarīne tere

kise mālūm nahīñ bārah mahīne tere

january february march meñ paḌegī sardī

aur april may june meñ ho gī garmī

terā man dahr meñ kuchh kho.egā kuchh pā.egā

apnī mī.ād basar kar ke chalā jā.egā

tū nayā hai to dikhā sub.h na.ī shaam na.ī

varna in āñkhoñ ne dekhe haiñ na.e saal ka.ī

be-sabab log kyoñ dete haiñ mubārak-bādeñ

ġhāliban bhuul ga.e vaqt kī kaḌvī yādeñ

terī aamad se ghaTī umr jahāñ se sab kī

'faiz' ne likkhī hai ye nazm nirāle Dhab kī

ai nae sal bata tujh mein naya-pan kya hai

har taraf KHalq ne kyon shor macha rakha hai

raushni din ki wahi taron bhari raat wahi

aaj hum ko nazar aati hai har ek baat wahi

aasman badla hai afsos na badli hai zamin

ek hindise ka badalna koi jiddat to nahin

agle barson ki tarah honge qarine tere

kise malum nahin barah mahine tere

january february march mein paDegi sardi

aur april may june mein ho gi garmi

tera man dahr mein kuchh khoega kuchh paega

apni miad basar kar ke chala jaega

tu naya hai to dikha subh nai sham nai

warna in aankhon ne dekhe hain nae sal kai

be-sabab log kyon dete hain mubarak-baaden

ghaaliban bhul gae waqt ki kaDwi yaaden

teri aamad se ghaTi umr jahan se sab ki

'faiz' ne likkhi hai ye nazm nirale Dhab ki