ai watan

ai vatan terī mohabbat qudratan is dil meñ hai

tere ehsānāt kā naġhma mirī mahfil meñ hai

naqsh-e-pā terā rahā manzil-numā tahzīb kā

rāhat-e-arz-o-samā pinhāñ tirī manzil meñ hai

bevafā.ī jis ne kī tujh se yaqīnan jo bhī ho

nā-mukammal us kā īmāñ kufr us ke dil meñ hai

ābrū-rezī tirī hone na deñge ai vatan

terī har shai kī hifāzat kā irāda dil meñ hai

is mohabbat ko parastish se badalnā bhuul hai

ye taqāza ye tavāzun is dil-e-kāmil meñ hai

sab se achchhā mulk merā naaz se jo ye kahe

faḳhr bejā hai ye us kā ḳhud-satā.ī dil meñ hai

naam le kar desh-bhaktī kā jo ḳhūñ-rezī kare

kaisī sāzish kaisī nafrat us dil-e-qātil meñ hai

ham pe ġhaddārī kī tohmat ye navāzish dekhiye

dekh liije zahr kitnā us rag-e-bātil meñ hai

is marīzāna ravayye se vatan majrūh hai

is kā nusḳha tū batā 'shāfī' jo tere dil meñ hai

ai watan teri mohabbat qudratan is dil mein hai

tere ehsanat ka naghma meri mahfil mein hai

naqsh-e-pa tera raha manzil-numa tahzib ka

rahat-e-arz-o-sama pinhan teri manzil mein hai

bewafai jis ne ki tujh se yaqinan jo bhi ho

na-mukammal us ka iman kufr us ke dil mein hai

aabru-rezi teri hone na denge ai watan

teri har shai ki hifazat ka irada dil mein hai

is mohabbat ko parastish se badalna bhul hai

ye taqaza ye tawazun is dil-e-kaamil mein hai

sab se achchha mulk mera naz se jo ye kahe

faKHr beja hai ye us ka KHud-satai dil mein hai

nam le kar desh-bhakti ka jo KHun-rezi kare

kaisi sazish kaisi nafrat us dil-e-qatil mein hai

hum pe ghaddari ki tohmat ye nawazish dekhiye

dekh lije zahr kitna us rag-e-baatil mein hai

is marizana rawayye se watan majruh hai

is ka nusKHa tu bata 'shafi' jo tere dil mein hai