aisi manaen holi

ho ke sarshār bahut ishq se gaa.eñ holī

ik na.e rañg se apnoñ ko sunā.eñ holī

le ke aa.ī hai ajab mast adā.eñ holī

mulk meñ aaj na.e ruḳh se dikhā.eñ holī

aaj har shaḳhs ko detī hai sadā.eñ holī

dosto aao chalo aisī manā.eñ holī

mulk se firqa-parastī ko haTā hī Daalo

dair-o-ka.aba ke tafarqe ko miTā hī Daalo

hind ko desh mohabbat kā banā hī Daalo

ye nayā giit zamāne ko sunā hī Daalo

Daal de mulk meñ ulfat kī binā.eñ holī

dosto aao chalo aisī manā.eñ holī

jo mohabbat ke buzurgoñ ne jalā.e the diye

paap kī tez havāoñ se vo ab bujhne lage

aaj parhalād ke bhī hoñT nahīñ kyuuñ hilte

har taraf pūjne vaale haiñ kañval kashyap ke

kaash ban jaa.e gunāhoñ kī chitā.eñ holī

dosto aao chalo aisī manā.eñ holī

har taraf bahne lage amn-o-sukūñ kā dariyā

kaash aa jaa.e buzurgoñ kā samay guzrā huā

rañg ham sab ko badalnā hai agar bhārat kā

aapsī phuuT se hai desh ko phir se ḳhatra

ham ko lāzim hai ki nafrat kī jalā.eñ holī

dosto aao chalo aisī manā.eñ holī

apne bhārat se ġharībī ko miTānā hai hameñ

apnī mehnat se na.e daur ko laanā hai hameñ

desh meñ naaj kā ambār lagānā hai hameñ

kār-ḳhānoñ meñ har ik chiiz banānā hai hameñ

sāz-e-mehnat pe na.e tarz se gaa.eñ holī

dosto aao chalo aisī manā.eñ holī

hind ko aaj mohabbat kī zarūrat hai 'kañval'

aaj har shaḳhs ko ulfat kī zarūrat hai 'kañval'

ab kisānoñ ko bhī himmat kī zarūrat hai 'kañval'

mulk ko ab isī daulat kī zarūrat hai 'kañval'

de rahī hai yahī har ik ko sadā.eñ holī

dosto aao chalo aisī manā.eñ holī

ho ke sarshaar bahut ishq se gaen holi

ek nae rang se apnon ko sunaen holi

le ke aai hai ajab mast adaen holi

mulk mein aaj nae ruKH se dikhaen holi

aaj har shaKHs ko deti hai sadaen holi

dosto aao chalo aisi manaen holi

mulk se firqa-parasti ko haTa hi Dalo

dair-o-kaba ke tafarqe ko miTa hi Dalo

hind ko desh mohabbat ka bana hi Dalo

ye naya git zamane ko suna hi Dalo

Dal de mulk mein ulfat ki binaen holi

dosto aao chalo aisi manaen holi

jo mohabbat ke buzurgon ne jalae the diye

pap ki tez hawaon se wo ab bujhne lage

aaj parhalad ke bhi honT nahin kyun hilte

har taraf pujne wale hain kanwal kashyap ke

kash ban jae gunahon ki chitaen holi

dosto aao chalo aisi manaen holi

har taraf bahne lage amn-o-sukun ka dariya

kash aa jae buzurgon ka samay guzra hua

rang hum sab ko badalna hai agar bhaarat ka

aapsi phuT se hai desh ko phir se KHatra

hum ko lazim hai ki nafrat ki jalaen holi

dosto aao chalo aisi manaen holi

apne bhaarat se gharibi ko miTana hai hamein

apni mehnat se nae daur ko lana hai hamein

desh mein naj ka ambar lagana hai hamein

kar-KHanon mein har ek chiz banana hai hamein

saz-e-mehnat pe nae tarz se gaen holi

dosto aao chalo aisi manaen holi

hind ko aaj mohabbat ki zarurat hai 'kanwal'

aaj har shaKHs ko ulfat ki zarurat hai 'kanwal'

ab kisanon ko bhi himmat ki zarurat hai 'kanwal'

mulk ko ab isi daulat ki zarurat hai 'kanwal'

de rahi hai yahi har ek ko sadaen holi

dosto aao chalo aisi manaen holi