ajib laDki

ajiib laḌkī hai vo

ki us ko ḳhudā banāyā to vo ḳhafā hai

chahār jānib

ibādatoñ kā hisār khīñchā

masāfatoñ ke shajar ugaa.e

hirās kī vus.atoñ ko maiñ ne

tilism-e-saut-o-sadā se bāñdhā

havāoñ ko samt-e-āgahī dī

shaboñ ke zaḳhmī kabūtaroñ ko lahū pilāyā

falak pe nīlāhaTeñ bikherīñ

ḳhalā meñ qaus-e-quzah ke rangīn par uḌaa.e

nigāh-o-dil kī fasīl par jism-o-jāñ sajā.e badan ugaa.e

magar vo laḌkī

ḳhudā.ī pā kar bhī muzmahil hai

vo ḳhush nahīñ hai

vo kah rahī thī

ki tum ne mujh ko ḳhudā banāyā

to kyā ye samjhūñ

ki koī mujh se bhī bālā-tar hai

ajib laDki hai wo

ki us ko KHuda banaya to wo KHafa hai

chahaar jaanib

ibaadaton ka hisar khincha

masafaton ke shajar ugae

hiras ki wusaton ko main ne

tilism-e-saut-o-sada se bandha

hawaon ko samt-e-agahi di

shabon ke zaKHmi kabutaron ko lahu pilaya

falak pe nilahaTen bikherin

KHala mein qaus-e-quzah ke rangin par uDae

nigah-o-dil ki fasil par jism-o-jaan sajae badan ugae

magar wo laDki

KHudai pa kar bhi muzmahil hai

wo KHush nahin hai

wo kah rahi thi

ki tum ne mujh ko KHuda banaya

to kya ye samjhun

ki koi mujh se bhi baala-tar hai