ajib qissa hai

ajiib qissa hai

jab ye duniyā samajh rahī thī

tum apnī duniyā meñ jī rahī ho

maiñ apnī duniyā meñ jī rahā huuñ

to ham ne saarī nigāhoñ se duur

ek duniyā basā.ī thī

jo ki merī bhī thī

tumhārī bhī thī

jahāñ fazāoñ meñ

donoñ ke ḳhvāb jāgte the

jahāñ havāoñ meñ

donoñ kī sargoshiyāñ ghulī thiiñ

jahāñ ke phūloñ meñ

donoñ kī aarzū ke sab rañg

khil rahe the

jahāñ pe donoñ kī jur.atoñ ke

hazār chashme ubal rahe the

na vasvase the na ranj-o-ġham the

sukūn kā gahrā ik samundar thā

aur ham the

ajiib qissa hai

saarī duniyā ne

jab ye jaanā

ki ham ne saarī nigāhoñ se duur

ek duniyā basā.ī hai to

har ek abrū ne jaise ham par kamān taanī

tamām peshāniyoñ pe ubhrīñ

ġham aur ġhusse kī gahrī shikneñ

kisī ke lahje se talḳhī chhalkī

kisī kī bātoñ meñ turshī aa.ī

kisī ne chāhā

ki koī dīvār hī uThā de

kisī ne chāhā

hamārī duniyā hī vo miTā de

magar zamāne ko hārnā thā

zamāna haarā

ye saarī duniyā ko mānñā hī paḌā

hamāre ḳhayāl kī ek sī zamīñ hai

hamāre ḳhvāboñ kā ek jaisā hī āsmāñ hai

magar purānī ye dāstāñ hai

ki ham pe duniyā

ab ek arse se mehrbāñ hai

ajiib qissa hai

jab ki duniyā ne

kab kā taslīm kar liyā hai

ham ek duniyā ke rahne vaale haiñ

sach to ye hai

tum apnī duniyā meñ jī rahī ho

maiñ apnī duniyā meñ jī rahā huuñ!

ajib qissa hai

jab ye duniya samajh rahi thi

tum apni duniya mein ji rahi ho

main apni duniya mein ji raha hun

to hum ne sari nigahon se dur

ek duniya basai thi

jo ki meri bhi thi

tumhaari bhi thi

jahan fazaon mein

donon ke KHwab jagte the

jahan hawaon mein

donon ki sargoshiyan ghuli thin

jahan ke phulon mein

donon ki aarzu ke sab rang

khil rahe the

jahan pe donon ki juraton ke

hazar chashme ubal rahe the

na waswase the na ranj-o-gham the

sukun ka gahra ek samundar tha

aur hum the

ajib qissa hai

sari duniya ne

jab ye jaana

ki hum ne sari nigahon se dur

ek duniya basai hai to

har ek abru ne jaise hum par kaman tani

tamam peshaniyon pe ubhrin

gham aur ghusse ki gahri shiknen

kisi ke lahje se talKHi chhalki

kisi ki baaton mein turshi aai

kisi ne chaha

ki koi diwar hi uTha de

kisi ne chaha

hamari duniya hi wo miTa de

magar zamane ko haarna tha

zamana haara

ye sari duniya ko manna hi paDa

hamare KHayal ki ek si zamin hai

hamare KHwabon ka ek jaisa hi aasman hai

magar purani ye dastan hai

ki hum pe duniya

ab ek arse se mehrban hai

ajib qissa hai

jab ki duniya ne

kab ka taslim kar liya hai

hum ek duniya ke rahne wale hain

sach to ye hai

tum apni duniya mein ji rahi ho

main apni duniya mein ji raha hun!