ajnabi aurat

asia ke dūr-uftāda shabistānoñ meñ bhī

mere ḳhvāboñ kā koī rūmāñ nahīñ!

kaash ik dīvār-e-zulm

mere un ke darmiyāñ haa.il na ho!

ye imārāt-e-qadīm

ye ḳhayābāñ, ye chaman, ye lāla-zār,

chāñdnī meñ nauha-ḳhvāñ

ajnabī ke dast-e-ġhārat-gar se haiñ

zindagī ke in nihāñ-ḳhānoñ meñ bhī

mere ḳhvāboñ kā koī rūmāñ nahīñ!

kaash ik ''dīvār-e-rañg''

mere un ke darmiyāñ haa.el na ho!

ye siyah-paikar barahna rāh-rau

ye gharoñ meñ ḳhūb-sūrat auratoñ kā zahr-e-ḳhand

ye guzargāhoñ pe dev-āsā javāñ

jin kī āñkhoñ meñ gurisna ārzuoñ kī lapak

mushta.il be-bāk mazdūroñ kā sailāb-e-azīm!

arz-e-mashriq, ek mub.ham ḳhauf se larzāñ huuñ maiñ

aaj ham ko jin tamannāoñ kī hurmat ke sabab

dushmanoñ kā sāmnā maġhrib ke maidānoñ meñ hai

un kā mashriq meñ nishāñ tak bhī nahīñ!

asia ke dur-uftada shabistanon mein bhi

mere KHwabon ka koi ruman nahin!

kash ek diwar-e-zulm

mere un ke darmiyan hail na ho!

ye imaraat-e-qadim

ye KHayaban, ye chaman, ye lala-zar,

chandni mein nauha-KHwan

ajnabi ke dast-e-ghaarat-gar se hain

zindagi ke in nihan-KHanon mein bhi

mere KHwabon ka koi ruman nahin!

kash ek diwar-e-rang

mere un ke darmiyan hael na ho!

ye siyah-paikar barahna rah-rau

ye gharon mein KHub-surat auraton ka zahr-e-KHand

ye guzargahon pe dew-asa jawan

jin ki aankhon mein gurisna aarzuon ki lapak

mushtail be-bak mazduron ka sailab-e-azim!

arz-e-mashriq, ek mubham KHauf se larzan hun main

aaj hum ko jin tamannaon ki hurmat ke sabab

dushmanon ka samna maghrib ke maidanon mein hai

un ka mashriq mein nishan tak bhi nahin!