ajnabi jazira

ajnabī jazīre par

kaise aa ga.ī huuñ maiñ

ek pal ko soī thī

aañkh jab khulī merī

ajnabī jazīra thā

ajnabī jazīre par

ik 'ajab udāsī kī dhund chhā.ī rahtī hai

ḳhauf kā añdherā yuuñ sarsarātā phirtā hai

jaise us kī āñtoñ meñ maut chhup ke baiThī hai

ajnabī jazīre par

sard aañkh ko le kar sard jism chalte haiñ

ḳhvāb munjamid ho kar

apnī apnī qabroñ meñ zinda leT jaate haiñ

ajnabī jazīre par

fard Darte phirte haiñ

ajnabī jazīre par sirf ḳhauf ugtā hai

harf apnī hurmat se ḳhud hī chhupte phirte haiñ

ajnabī jazīre par

pāsbāñ nahīñ hote

ḳhauf kī farāvānī qabr ke muqaddar meñ phuul likhtī jaatī hai

go ki us jazīre par phuul ab nahīñ khilte

aur ḳhushbueñ aksar maut kī ġhulāmī meñ tauq pahne phirtī haiñ

giit ke suroñ meñ vo nauhe gaatī phirtī haiñ

is 'ajab jazīre par

ḳhauf kā ye 'ālam hai

qatl hone vaale jism

apne qātiloñ ke saath bandagī sī karte haiñ

qatl ke tanāzur meñ saare vāqa'e rakh kar 'āshiqī sī karte haiñ

kaisī 'āshiqī hai ye

kaisā ye jazīra hai

pāsbāñ se qātil tak

kaun chal ke aayā thā

kis ne sard āñkhoñ se munjamid shabīhoñ ko noch ke nikālā thā

kis ne harf kā mā'nī apnī kokh meñ rakkhe jhuuT se badal Daalā

kis ne phūl-fikroñ ko izn maut kā de kar ḳhār-zār beche haiñ

ajnabī jazīre ke sāhiloñ kī miTTī meñ kitne raaz so.e haiñ

ajnabī jazīre par sirf maut rahtī hai

aur jo bhī rahtā hai maut kī tijārat se 'āshiqī sī kartā hai

ajnabī jazīre par

kaise aa ga.ī huuñ maiñ

ajnabi jazire par

kaise aa gai hun main

ek pal ko soi thi

aankh jab khuli meri

ajnabi jazira tha

ajnabi jazire par

ek 'ajab udasi ki dhund chhai rahti hai

KHauf ka andhera yun sarsaraata phirta hai

jaise us ki aanton mein maut chhup ke baiThi hai

ajnabi jazire par

sard aankh ko le kar sard jism chalte hain

KHwab munjamid ho kar

apni apni qabron mein zinda leT jate hain

ajnabi jazire par

fard Darte phirte hain

ajnabi jazire par sirf KHauf ugta hai

harf apni hurmat se KHud hi chhupte phirte hain

ajnabi jazire par

pasban nahin hote

KHauf ki farawani qabr ke muqaddar mein phul likhti jati hai

go ki us jazire par phul ab nahin khilte

aur KHushbuen aksar maut ki ghulami mein tauq pahne phirti hain

git ke suron mein wo nauhe gati phirti hain

is 'ajab jazire par

KHauf ka ye 'alam hai

qatl hone wale jism

apne qatilon ke sath bandagi si karte hain

qatl ke tanazur mein sare waqa'e rakh kar 'ashiqi si karte hain

kaisi 'ashiqi hai ye

kaisa ye jazira hai

pasban se qatil tak

kaun chal ke aaya tha

kis ne sard aankhon se munjamid shabihon ko noch ke nikala tha

kis ne harf ka ma'ni apni kokh mein rakkhe jhuT se badal Dala

kis ne phul-fikron ko izn maut ka de kar KHar-zar beche hain

ajnabi jazire ke sahilon ki miTTi mein kitne raaz soe hain

ajnabi jazire par sirf maut rahti hai

aur jo bhi rahta hai maut ki tijarat se 'ashiqi si karta hai

ajnabi jazire par

kaise aa gai hun main