ajnabi

ai hama-rañg hama-nūr hama-soz-o-gudāz

bazm-e-mahtāb se aane kī zarūrat kyā thī

tū jahāñ thī usī jannat meñ nikhartā tirā ruup

is jahannam ko basāne kī zarūrat kyā thī

ye ḳhad-o-ḳhāl ye ḳhvāboñ se tarāshā huā jism

aur dil jis pe ḳhad-o-ḳhāl kī narmī bhī nisār

ḳhaar hī ḳhaar sharāre hī sharāre haiñ yahāñ

aur tham tham ke uThā paañv bahāroñ kī bahār

tishnagī zahr bhī pī jaatī hai amrit kī tarah

jaane kis jaam pe ruk jaa.e nigāh-e-ma.asūm

Dūbte dekhā hai jin āñkhoñ meñ mai-ḳhāna bhī

pyaas un āñkhoñ kī bujhe yā na bujhe kyā ma.alūm

haiñ sabhī husn-parast ahl-e-nazar sāhib-e-dil

koī ghar meñ koī mahfil meñ sajā.egā tujhe

tū faqat jism nahīñ sher bhī hai giit bhī hai

kaun ashkoñ kī ghanī chhāñv meñ gā.egā tujhe

tujh se ik dard kā rishta bhī hai bas pyaar nahīñ

apne āñchal pe mujhe ashk bahā lene de

tū jahāñ jaatī hai jaa, rokne vaalā maiñ kaun

apne raste meñ magar sham.a jalā lene de

ai hama-rang hama-nur hama-soz-o-gudaz

bazm-e-mahtab se aane ki zarurat kya thi

tu jahan thi usi jannat mein nikharta tera rup

is jahannam ko basane ki zarurat kya thi

ye KHad-o-KHal ye KHwabon se tarasha hua jism

aur dil jis pe KHad-o-KHal ki narmi bhi nisar

KHar hi KHar sharare hi sharare hain yahan

aur tham tham ke uTha panw bahaaron ki bahaar

tishnagi zahr bhi pi jati hai amrit ki tarah

jaane kis jam pe ruk jae nigah-e-masum

Dubte dekha hai jin aankhon mein mai-KHana bhi

pyas un aankhon ki bujhe ya na bujhe kya malum

hain sabhi husn-parast ahl-e-nazar sahib-e-dil

koi ghar mein koi mahfil mein sajaega tujhe

tu faqat jism nahin sher bhi hai git bhi hai

kaun ashkon ki ghani chhanw mein gaega tujhe

tujh se ek dard ka rishta bhi hai bas pyar nahin

apne aanchal pe mujhe ashk baha lene de

tu jahan jati hai ja, rokne wala main kaun

apne raste mein magar shama jala lene de